بە مەبەستی ڕاوەدوونانی پاشماوەکانی چەکدارانی داعش و خاپوورکردنی حەشارگە و مۆڵگەکانیان، دەزگای دژەتیرۆری عێراق دەستپێکردنی هەڵمەتێکی گەورە و بەرفراوانی کێوماڵکردن و پشکنینی ئەمنی لە ناوچە بیابانی و سنوورییەکانی هەشت پارێزگای وڵاتەکە ڕاگەیاند.
ئاوێنە: لە ڕاگەیەندراوێکی فەرمیدا کە لە چوارچێوەی هەوڵەکان بۆ بەهێزکردنی ئاسایش و سەقامگیری بڵاوکراوەتەوە، دەزگاکە ئاشکرای کردووە کە ئەم ئۆپەراسیۆنە بە شێوەیەکی کوتوپڕ نییە، بەڵکو بە پشت‌بەستن بە زانیارییە هەواڵگری و مەیدانییە زۆر وردەکان بەڕێوەدەچێت. پرۆسەکە لە ڕێگەی بەدواداچوون و پشکنینی ئاسمانی و زەمینییەوە ئەنجام دەدرێت و تێیدا یەکە تایبەتمەندەکانی دژەتیرۆر، تیمی ئەندازیاریی تەقەمەنی و سەگی پۆلیسی (K9) بەشدارییەکی کارایان تێدا هەیە.
سەبارەت بە جوگرافیای ئۆپەراسیۆنەکە، دەزگای دژەتیرۆر ڕوونی کردووەتەوە کە هەڵمەتەکە پانتاییەکی فراوانی گرتووەتەوە و کێوماڵی ئەم ناوچانە دەکرێت:
بیابانی ڕۆژئاوای پارێزگای نەینەوا
قەزای بێجی لە پارێزگای سەڵاحەدین
ناوچەی بادیەی نەجەف
بیابانی نوخەیب لە پارێزگای ئەنبار
ناحیەی قەزانیە لە باکووری شارۆچکەی بەدرە لە پارێزگای واست
شارۆچکەی مەندەلی لە پارێزگای دیالە
شارۆچکەی فەهوود لە پارێزگای زیقار
بادیەی موسەنا لەگەڵ تەواوی ناوچە بیابانییەکانی پارێزگای بەسڕە
لە کۆتایی ڕاگەیەندراوەکەدا، دەزگای دژەتیرۆری عێراق دڵنیایی تەواوی داوەتە هاووڵاتییان کە ئەم جۆرە ڕێکارانە بەشێکن لە ستراتیژیەت و پلانە ئەمنییە پێشوەختەکانیان. جەختیشیکردووەتەوە کە ئامانجی سەرەکی لەم هەنگاوانە؛ تۆکمەکردنی کۆنترۆڵی ئەمنی، بەرزکردنەوەی ئاستی ئامادەباشییە لە سەرجەم کەرتە سەربازییەکاندا، بە شێوەیەک کە بە تەواوی خزمەت بە پاراستنی گیانی هاووڵاتییان و جێگیرکردنی ئاسایشی گشتی بکات لە عێراقدا.