عه‌لی زه‌یدی، سه‌رۆك وه‌زیرانی عێراق له كۆبونه‌وه‌یدا له‌گه‌ڵ هه‌ڵسوڕێنه‌ری باڵیۆزخانه‌ی ئه‌مریكا جه‌خت له كاركردن بۆ ره‌چاوكردنی زمانی گفتوگۆ و دیپلۆماسییه‌ت ده‌كات له چاره‌سه‌ركردنی ململانێكان و چه‌سپاندنی سه‌قامگیری له ناوچه‌كه‌دا.
ئاوێنه: به‌پێی راگه‌یه‌ندراوێكی نوسینگه‌كه‌ی، ئه‌مڕۆ یه‌كشه‌ممه، عەلی زەیدی، سه‌رۆك وه‌زیرانی عێراق، پێشوازی كرد له جۆشوا هاریس، هه‌ڵسوڕێنه‌ری باڵیۆزخانەی ئه‌مریكا له به‌غداو له كۆبونه‌وه‌ی نێوانیاندا ئاسۆکانی هاریكاری نێوان هەردو وڵات و ڕێگاکانی پەرەپێدان و فراوانکردنی پەیوەندییەکان لە سەرجەم بوارەکاندا، بەتایبەتی ئابوری، وەبەرهێنان و كولتوری، لەسەر بنەمای ڕێز له یه‌كگرتن و بەرژەوەندی هاوبەش تاوتوێ کران.
سه‌رۆك وه‌زیرانی عێراق ئاماژەی بە گرنگی پەیوەندی بونیادنەر لە نێوان هەردو وڵات و بەردەوامی کارکردنی هاوبەش لە چوارچێوەی ڕێککەوتنامەی چوارچێوەی ستراتیژی و یاداشتنامە دوقۆڵییەکاندا کرد، لەگەڵ جەختکردنەوە لەسەر پابەندبونی هەردولا بە بەهێزکردنی هاوبەشی و هەماهەنگی بەرامبەر بە پرسە جیاوازە دوقۆڵی و هەرێمییەکان و کارکردن بۆ ره‌چاوكردنی زمانی گفتوگۆ و دیپلۆماسییه‌ت لە چارەسەرکردنی ململانێکان و چەسپاندنی ئاسایش و سەقامگیری لە ناوچەکەدا.
لای خۆیەوە، هه‌ڵسوڕێنه‌ری باڵیۆزخانه‌ی ئەمریکا پێزانینی وڵاتەکەی بۆ هەوڵەکانی عێراق لە پێناو بەهێزکردنی هاوبەشییە دوقۆڵییەکان لە بوارە جیاوازەکاندا دەربڕی و ستایشی ڕۆڵی كاریگه‌رو هەوڵە پاڵپشتیكاره‌كانی عێراقی کرد بۆ چەسپاندنی ئاسایش و سەقامگیریی ناوچه‌كه.