لە کۆبوونەوەیەکی گرنگدا کە لە شاری بەغدا و لە نووسینگەی حەیدەر عەبادی، سەرۆکی هاوپەیمانیی نەسر بەڕێوەچوو، هاوپەیمانیی چوارچێوەی هاوئاهەنگی چەند بڕیار و هەڵوێستێکی یەکلاکەرەوەی سەبارەت بە دۆخی ئەمنی و سیاسیی عێراق راگەیاند.
ئاوێنە: چوارچێوەی هاوئاهەنگی بە فەرمی عەلی فالح زەیدی، سەرۆکوەزیرانی عێراقی سەرپشک کرد بۆ ئەوەی تەواوی رێکار و بڕیارە پێویستەکان بگرێتەبەر بەمەبەستی سنووردارکردن و قەتیسکردنی چەک تەنیا بەدەست دامەزراوەکانی دەوڵەتەوە. ئەمەش وەک هەنگاوێکی بنەڕەتی بۆ پاراستنی سەقامگیری و بەرژەوەندییە باڵاکانی وڵات دانراوە.
لە بەشێکی دیکەی راگەیێندراوەکەیاندا، هاوپەیمانیەتییەکە جەختی لەوە کردەوە کە دەستەی حەشدی شەعبی دامەزراوەیەکی ئەمنیی فەرمییە و بە تەواوی پابەندە بە دەستوور، یاسا بەرکارەکان و فەرمانەکانی فەرماندەی گشتیی هێزە چەکدارەکان.
لەپێناو جێبەجێکردنی رێنماییەکانی مەرجەعییەتی باڵا، یاسای تایبەت بە دەستەکە و ئەو کارنامەیەی حکومەت کە لەلایەن پەرلەمانەوە دەنگی لەسەر دراوە، چوارچێوەی هاوئاهەنگی پاڵپشتیی تەواوی خۆی دەربڕی بۆ:
- پرۆژەی قەتیسکردنی چەک بەدەستی دەوڵەتەوە.
- دابڕاندن و جیاکردنەوەی تەواوەتیی دەستەی حەشدی شەعبی لە سەرجەم هێزە سیاسی، حیزبی و کۆمەڵایەتییەکان.
چوارچێوەی هاوئاهەنگی، کە خاوەنی زیاتر لە ١٦٤ کورسیی پەرلەمانیی عێراقە، هۆشداریی دا کە بڕیاردان لەسەر هەڵگیرسانی جەنگ یان چەسپاندنی ئاشتی، پرسێکی سەروەریی نیشتمانییە و تەنیا دەگەڕێتەوە بۆ گەلی عێراق لە رێگەی دامەزراوە دەستوورییەکانییەوە (کە پەرلەمان و حکومەتن).
هەر لەم چوارچێوەیەدا ئاماژە بەوە کراوە کە:
- هەر هەنگاو و جووڵەیەک لە دەرەوەی ئەم چوارچێوە فەرمییە، بە دەرچوون لە یاسا و لادان لە بنەماکانی دەوڵەتی دەستووری هەژمار دەکرێت.
- دیاریکردنی شێوازی سیستمی سیاسی و نوێنەرایەتیکردنی مافەکان، تەنیا مافی رەوای گەلی عێراقە.
- سەبارەت بە پەیوەندییە دەرەکییەکانیش، هاوپەیمانیەتییەکە پەرۆشیی خۆی دووپاتکردەوە بۆ درێژەدان بە هاریکارییەکانی نێوان حکومەتی عێراق و کۆمەڵگەی نێودەوڵەتی. هاوکات، سەرۆکوەزیرانی سەرپشک کرد بۆ تەواوکردنی سەرجەم ئەو رێکارانەی کە پەیوەستن بە کۆتاییهێنان بە ئەرکی هاوپەیمانیی نێودەوڵەتیی دژی داعش لە خاکی عێراقدا.