لە لێدوانێکی تەلەفزیۆنیدا، کازیم فەرتوسی، وتەبێژی کەتایبی سەیدلشوهەدا، هۆشدارییەکی توندی ئاراستەی دەسەڵاتدارانی عێراق کرد سەبارەت بە هەوڵەکانیان بۆ چەککردنی گروپە چەکدارەکان. ناوبراو ئاماژەی بەوە کرد کە پێویستە حکومەت دەستبەرداری ئەو پرسە ببێت، چونکە نەک تەنها رووبەڕووی شکست دەبنەوە، بەڵکو هەنگاوێکی لەو شێوەیە دەبێتە هۆی شەرمەزاری و تەنانەت رووخانی کابینەی حکومەتیش. فەرتوسی داوای لە بەرپرسان کرد کە بە رۆحیەتێکی نیشتمانییەوە مامەڵە بکەن و چەکی ئەو گروپانە وەک بەشێک لە شکۆ و سەروەریی خاکی عێراق سەیر بکەن.
ئاوێنە: لە بەشێکی دیکەی قسەکانیدا، وتەبێژەکەی کەتایبی سەیدلشوهەدا گەڕایەوە بۆ قۆناغی هێرشەکانی رێکخراوی داعش و بەراوردکارییەکی لە نێوان سوپا و گروپە چەکدارەکاندا کرد. ئەو رایگەیاند کە دەبێت دەسەڵاتداران ئەوەیان لەبیربێت کە لەو سەردەمەدا هێزە ئەمنییەکان سەرکردایەتییەکی پێویستیان نەبوو و نەیانتوانی بەرگری لە نیشتمان بکەن و پاشەکشەیان کرد، لە بەرامبەردا ئەوە گروپە چەکدارەکان بوون کە بەرگرییان لە عێراق کرد و وڵاتیان رزگار کرد. هەروەها بانگەشەی ئەوەشی کرد کە ئەو حەشدی شەعبییەی ئێستا هەیە، هەر لەلایەن ئەو گروپانەوە مەشقی پێکراوە و سەرکردایەتی دەکرێت.
سەبارەت بە پرسی بوونی هێزەکانی ئەمریکا لە عێراق، کازیم فەرتوسی ئەو باسانەی رەتکردەوە کە باس لە کشانەوەی هێزەکانی ئەمریکا دەکەن لە مانگی ئەیلولی داهاتوودا و بە "خەیاڵ" وەسفی کردن. ناوبراو رایگەیاند کە تەنها کەسانی "گەمژە" متمانە بە لێدوانەکانی ئەمریکا دەکەن. جەختیشی لەوە کردەوە کە ئەگەر لە رابردوودا هەر جۆرە کشانەوەیەک لەلایەن هێزەکانی ئەمریکاوە روویدابێت، ئەوا تەنها دەرئەنجامی فشار و چەکی هێزەکانی مقاوەمە بووە، نەک بەرهەمی هیچ رێککەوتنێکی دیپلۆماسی لە نێوان بەغداد و واشنتۆن.