ماڵپەڕێکی عەرەبی بڵاویکردووەتەوە، کە تۆمارکردنی پڕۆسەی چەکدانان و رادەستکردن دەستیپێکردووە و رێگە نادرێت میلیشیاكانی عێراق بەشێوەی گروپ دابەشنابن و بەڵکو بە تاك بەسەر سوپاو دەزگا ئەمنیەكاندا دابەشدەكرێن.
ئاوێنە: ماڵپەڕی "ئەلحوڕە" لەزاری ئەفسەرێکی باڵای سوپای عێراقەوە ئاشکرایکرد "پرۆسەی تێكەڵكردنە بە دابەشکردنی ئەندامانی ئەو گروپانە بەسەر یەكە جیاوازەکانی هێزە ئەمنییەکاندا، وەک تاک ئەنجامدەدرێت نەک وەک گروپ، ئەمەش ئامانجی رێگریکردنە لە پێکهێنانی هەر بلۆکێکی رێکخراو لەناو سوپا یان دەزگا ئەمنییەکان و مسۆگەرکردنی ملکەچبوونی راستەوخۆیان بۆ فەرماندەی گشتی هێزە چەکدارەکان".
ئەو ئەفسەرە وتووشیەتی "مەبەست لەم کارە رێگریکردنە لەوەی هیچ قورساییەكی بەرچاویان لەناو دامەزراوە ئەمنییەکاندا هەبێت و وەک هەر ئەندامێکی دیکەی دامەزراوە ئەمنییەکان مامەڵەیان لەگەڵ دەکرێت، ئەو فەرمانانەشی وەریدەگرن تەنها لە فەرماندەی گشتی هێزە چەکدارەکانەوە دێت".
تاوەکو ئێستا (سەرایا سەلام و عەسایب و كەتایبی ئیمام عەلی) رازیبوون بە پێدانی چەکەکانیان بە حکومەتی فیدراڵ و بەگوێرەی ئەو سەرچاوەیە، لە دوو رۆژی رابردوودا لیژنەکان پێکهێنراون کە پێکهاتوون لە نوێنەرانی وەزارەتەکانی بەرگری و ناوخۆ، هێزەکانی حەشدی شەعبی و نوێنەری گرووپەكان، ئەم لیژنانە لە ئێستاوە دەستیان کردووە بە تۆماركردنی چەکی سوک و مامناوەند و قورس وەک ئامادەکارییەک بۆ رادەستکردنی بە دەسەڵاتداران.