وەزیری دەرەوەی عێراق رایگەیاند، ئەگەر گرووپەكان چەك دانەنێن ئەمریكا مامەڵەی لەگەڵ عێراق دەگۆڕێت و كارەسات روودەدات.
ئاوێنە: فوئاد حسێن، وەزیری دەرەوەی عێراق لە دیمانەیەکدا لەگەڵ کەناڵی "ئەلشەرقیە نیوز"، وتی "ئەمریكا پێداگرە لەسەر داماڵینی چەكی گرووپەكان، واشنتۆن وا تەماشای ئەو چەكانە دەكات كە دژی ئەوانە و دژی وڵاتانی كەنداو بەكارهاتووە كە هاوپەیمانی ئەمریكان، هەروەها واشنتۆن مەرجی بۆ عێراق داناوە، ئەگەر عێراق گروپەكان چەك نەكات مامەڵەكانی دەگۆرێت و وڵات و حكومەت دووچاری كارەسات دەبێت".
وتیشی "عەلی زەیدی، سەرۆكوەزیرانی عێراق خۆی بە شەخسی دانوستان لەگەڵ گروپەكان دەكات، دۆسیەی داماڵینی چەك پێویستی بە پلان و دیاریكردنی وادەی زەمەنی و لێگەیشتنی هەرێمایەتی هەیە".
ناوبراو باس لەوەدەکات کە زۆرێك لەو گروپانە باڵی سیاسیان هەیە و لە حكومەت بەشداربوون و دەیانەوێت بەشداری بكەن، "چۆن دەكرێت بەشێك بن لە حكومەت و خاوەنی چەكیش بن لە دەرەوەی دەوڵەت".
وەزیری دەرەوەی عێراق رونیشیکردەوە "لایەنی ئێرانی وەك بەرەی مقاوەمە لەو گروپانە و چەكەكانیان دەڕوانێت، گروپەكانیش خۆیان بە بەشێك لە بەرەی مقاوەمە دەزانن، ئەمە پێچەوانەی دەستوری عێراقە، ئەمە پێویستی بە پێناسەكردنەوە هەیە، ئەگەر ئەمانە مقاوەمەی هەرێمایەتین ئەوە سەربە ئێرانن و پەیوەندییان بە عێراقەوە نییە، ئەگەر مقاوەمەیەكی نیشتمانی عێراقیشن، ئەوە ئێمە بەشێك نین لەشەڕ و پێویستمان بە مقاوەمە نییە".
وەزیری دەرەوەی ئاماژە بە دۆخی دارایی عێراق دەکات و نەیشاردەوە کە دۆخەکە "نادیارە"، هەروەها بانكی ناوەندی ٢٥ تریلیۆن دیناری چاپ كردووە، دەشڵێت "ئێمە ناتوانین لەڕێی چاپكردنی پارە ئەو دۆخە ئیدارە بدەین، چونكە هەڵاوسان دروست دەكات، ئێستا داهاتمان نییە و پەنامان بۆ یەدەگ بردووە."
"ئەگەر جەنگ تا كۆتایی ئەمساڵ بەردەوامبێت ئەوە عێراق دووچاری كارەسات دەبێت". فوئاد حوسێن وای وت