لایەنە سیاسییەکانی نێو چوارچێوەی هەماهەنگی، لە ڕێگەی ڕاگەیەندراوێکی فەرمییەوە، ناوەڕۆکی کۆبوونەوەی دوایینی خۆیان و شێوازی پاڵپشتییەکانیان بۆ حکومەتەکەی عەلی زەیدی خستەڕوو. چوارچێوەکە ئاماژەی بەوە کردووە کە سەرجەم هێزە سیاسییەکانیان لەسەر ئاستی پەرلەمانی، سیاسی و میدیایی، هاوکار و پشتیوانی جێبەجێکردنی بەرنامە چاکسازییەکەی حکومەت دەبن.
ئاوێنە: کۆبوونەوەکە شەوی ڕابردوو لە نووسینگەی عەممار حەکیم و بە ئامادەبوونی سەرۆکوەزیران بەڕێوەچوو، کە تێیدا کۆمەڵێک پرسی گرنگی ڕۆژەڤ و کاروباری گشتی وڵات تاوتوێ کران:
- تێپەڕاندنی قەیرانی ئابووری: سەرۆکوەزیران دیدگایەکی گشتگیری و پێشنیار و چارەسەری گونجاوی بۆ تێپەڕاندنی دۆخی ئابووری خستەڕوو، کە لەلایەن ئامادەبووانەوە پێشوازی و پاڵپشتی لێکرا.
- کەرتی خزمەتگوزاری و وزە: جەخت لەسەر دۆزینەوەی چارەسەری بەپەلە و خێرا بۆ قەیرانی کارەبا کرایەوە.
- پەرەپێدانی کەرتی تایبەت: ئامادەبووان جەختیان لە پێویستی چالاککردنی یاساکانی کار و دەستەبەری کۆمەڵایەتی کردەوە وەک هەنگاوێک بۆ بەهێزکردنی کەرتی تایبەت.
لە بەشێکی تری کۆبوونەوەکەدا، هێزە سیاسییەکانی چوارچێوەی هەماهەنگی ڕێککەوتن لەسەر داڕشتنی پڕۆژەیەکی تایبەت بە ناوی (چوارچێوەی هەماهەنگی). ئەم پڕۆژەیە گرنگترین پرسە نیشتمانییەکان لەخۆدەگرێت و بڕیارە بخرێتە بەردەم “هاوپەیمانی ئیدارەی دەوڵەت” بە مەبەستی گفتوگۆکردن و گەیشتن بە ڕێککەوتنی هاوبەش لەسەری.
کۆبوونەوەکە بە جەختکردنەوە لەسەر یەکدەنگی تەواوی هێزە سیاسییەکان لە پشت کابینەی حکومەتەوە کۆتایی هات، بە ئامانجی سەرخستنی پڕۆسەی چاکسازی و پەلەکردن لە تەواوکردنی پێکهاتەی کابینەی وزاری لە زووترین کاتدا.