وەزارەتی ئاوەدانکردنەوە و نیشتەجێکردنی عێراق، ئامادەکارییەکانی بۆ کاراکردنەوەی پلانی ساڵانەی تایبەت بە پێدانی قەرزی سندوقی نیشتەجێبوون بە هاوڵاتیان ڕاگەیاند. وتەبێژی وەزارەتەکە ئاماژەی بەوە کردووە کە ئەم هەنگاوە لە چوارچێوەی هەوڵەکانی حکومەتدایە بۆ بوژاندنەوەی کەرتی نیشتەجێبوون، هەروەها بۆ ڕەخساندنی دەرفەتێکی گونجاوە بۆ ئەو کەسانەی دەیانەوێت خانووی نوێ دروست بکەن، یان ئەو کەسانەی پرۆسەی دروستکردنی خانووەکانیان تەواو نەکردووە و پێویستیان بە پاڵپشتییە.
ئاوێنە: لە لێدوانێکی فەرمیدا، ئیستبرەق سەباح، وتەبێژی وەزارەتی ئاوەدانکردنەوە ڕایگەیاند کە پلانە نوێیەکە هاوتایە لەگەڵ ستراتیژیەتی حکومەت بۆ دەستەبەرکردنی یەکەی نیشتەجێبوونی شایستە بۆ هاوڵاتیان. جەختیشی لەوە کردەوە کە ئەم قەرزانە هیچ جۆرە سوودێکی داراییان ناچێتە سەر و ئامانج لێی بەتەواوی تەنها پاڵپشتیکردنی خەڵکە. سەبارەت بە شێوازی پێدانی پارەکەش، بڕی قەرزەکە بەسەر چەند قۆناغێکدا دابەش دەکرێت و بەپێی بەرەوپێشچوونی کارەکانی بیناسازی لە پرۆژەکەدا، دەدرێتە خاوەنەکەی.
سەبارەت بە سەرچاوەی دابینکردنی پارەی قەرزەکە، ئیستبرەق سەباح باسی لەوە کرد کە سندوقەکە پشت بە سیستەمێکی "خۆبژێوی" دەبەستێت. ئەمەش بەو واتایە دێت کە ئەو پارانەی لە قەرزدارانی پێشوو دەگەڕێندرێنەوە، جارێکی دیکە دەخرێنەوە ناو سندوقەکە و وەک قەرزی نوێ دەدرێنەوە بە هاوڵاتیان، بۆ ئەوەی بتوانرێت وەڵامی ئەو خواستە زۆرە بدرێتەوە. بەپێی ئامارەکانی وەزارەت، لە سەرەتای ئەمساڵەوە بەردەوام بوون لە ڕاییبکردنی مامەڵەی ئەو کەسانەی پێشتر داواکارییان پێشکەش کردووە، کە ژمارەیان نزیکەی حەوت هەزار مامەڵە دەبێت و پرۆسەکانیان گەیشتووەتە قۆناغی کۆتایی.
سەبارەت بە کات و شێوازی پێشکەشکردنی داواکاری، وەزارەتی ئاوەدانکردنەوە ڕونیکردووەتەوە کە پرۆسەکە تەنها یەکجار لە ساڵێکدا بەردەست دەبێت و بۆ ماوەی چەند ڕۆژێکی کەم دەخایەنێت. بە مەبەستی ڕێگریکردن لە دروستبوونی قەرەباڵغی و فشار لەسەر سیستەمەکە، وەزارەت بڕیاریداوە هەر ڕۆژێک تەرخان بکات بۆ چوار تا پێنج پارێزگا، بۆ ئەوەی هاوڵاتیان بەبێ کێشە و بە ئاسانی ناوی خۆیان تۆمار بکەن. وەک نموونەیەکیش بۆ خواستی زۆری هاوڵاتیان، وەزارەتەکە ئاشکرایکرد کە لە مانگی شوباتی ساڵی ڕابردوودا کە سیستەمەکە کارا کرا، تەنها لە ماوەی چوار ڕۆژدا زیاتر لە ٢٦ هەزار مامەڵەی قەرز بە سەرکەوتوویی وەرگیرابوون.