وه‌زاره‌تی بازرگانی عێراق، ئه‌مڕۆ دوشه‌ممه، خزمه‌تگوزاری جیاكردنه‌وه‌ی خێزانی له فۆرمی خۆراكی ئه‌لیكترۆنی راگه‌یاند.
ئاوێنه: وەزارەتەکە لە راگه‌یه‌ندراوێكدا ئاماژەی بەوە کردوە کە خزمەتگوزاریی جیاکردنەوەی خێزانەکان لە لقه‌كانی فۆرمی خۆراک له نەینەوا، کەرکوک، سلێمانی، هەولێر، هەڵەبجە، بەسرە، زیقار، میسان، دیوانییە، موسەنا، سەڵاحەددین، ئەنبار، بەلەد، کەربەلا، نەجەف لە ڕێگەی بەرنامەی فۆرمی خۆراکی ئەلیکترۆنییەوە کارا کردوه.
تالیب حه‌سه‌ن نه‌عمه، بەڕێوەبەری گشتیی فەرمانگەی پلاندانان و بەدواداچون له وه‌زاره‌ته‌كه رونیكرده‌وه "ئەم هەنگاوە لە چوارچێوەی هەوڵەکانی وەزارەتدایە بۆ پەرەپێدانی خزمەتگوزارییەکانی فۆرمی خۆراک و ئاسانکاریی ڕێکارەکان بۆ هاوڵاتییان، بە بەکارهێنانی سیستەمە ئەلیکترۆنییە هاوچەرخەکان".
هه‌روه‌ها وتیشی"ئەم خزمەتگوزارییە پێشتر لە لقەکانمان لە بەغدا و لقەکانی فۆرمی خۆراکی واست، دهۆک، بابل و دیالە کاراکرابو، بەمەش ئەم خزمەتگوزارییە بۆ سەرجەم هاوڵاتییان لە هەمو لقەکانی فۆرمی خۆراکماندا به‌رده‌سته."