وەزارەتی دادی عێراق، ئەمڕۆ سێشەممە ٢٣ی حوزەیرانی ٢٠٢٦، رایگەیاند کە لە چوارچێوەی بەدواداچوونە یاساییەکانیان بۆ بەرگریکردن لە بەرژەوەندییە گشتییەکان، توانیویانە دۆسیەیەکی دادوەری لە دادگای فیدراڵی باڵای ئەمریکا بە قازانجی دەوڵەتی عێراق یەکلایی بکەنەوە.
ئاوێنە: بەپێی ئەو روونکردنەوەیەی وەزارەتەکە بڵاویکردووەتەوە، دادگای فیدراڵی باڵای ئەمریکا بڕیاری کۆتایی لەبارەی ئەو سکاڵایە دەرکردووە کە لەلایەن کۆمپانیایەکی ئوردنییەوە دژی ژمارەیەک لە کۆمپانیاکانی سەر بە وەزارەتی پیشەسازی و کانزاکانی عێراق تۆمار کرابوو. سکاڵاکە پەیوەست بوو بە داواکردنی قەرەبووی دارایی بە بڕی ٥٣ ملیۆن دۆلاری ئەمریکی.
وەزارەتی داد جەختی لەوە کردەوە کە بڕیارەکەی دادگای ئەمریکی "حوکمێکی کەتعی و یەکلاکەرەوەیە"، بەمەش حکومەتی عێراق پابەند ناکرێت بە پێدانی ئەو بڕە پارەیەی کە داواکرابوو.
لەلایەکی دیکەوە، وەزارەتی داد ئەو دەرەنجامەی بە "دەستکەوتێکی یاسایی" ناوبردووە کە ئەنجامی ماندووبوونی تیمەکانی داکۆکیکردنە لە دۆسیە دەرەکییەکانی عێراق. لە بەیاننامەکەدا هاتووە کە ئەم بڕیارە سەلمێنەری دروستیی هەڵوێستی یاسایی عێراقە لە رووبەڕووبوونەوەی ئەو داواکارییە داراییانەی ئاراستەی دامەزراوە حکومییەکان دەکرێن، هەروەها جەختکردنەوەیە لەسەر بەردەوامیی هەوڵەکان بۆ پاراستنی سامانی گشتی و مافی دارایی دەوڵەت لە رێگەی رێکارە یاساییەکانەوە.