بەڕێوەبەرایەتیی پسوولەی خۆراکی هەڵەبجە، زانیاریی وردی لەبارەی خزمەتگوزارییەکانی سیستەمی ئەلیکترۆنیی پسوولەی خۆراک خستە ڕوو، بەتایبەت بۆ ئەو هاووڵاتییانەی لە سێ ساڵی ڕابردوودا ژیانی هاوسەرگیرییان پێکهێناوە و تا ئێستا فۆرمی سەربەخۆی خۆراکیان نییە.
ئاوێنە: بەپێی ڕاگەیەندراوەکەی بەڕێوەبەرایەتییەکە، لە ئێستادا قۆناغی **"جیاکردنەوە"**ی فۆرمی خۆراک لە سەرجەم پارێزگاکانی عێراقدا چووەتە بواری جێبەجێکردنەوە. پڕۆسەی ڕێکخستنی فۆرم بۆ هاوسەرانی نوێ بە دوو قۆناغ ئەنجام دەدرێت؛ قۆناغی یەکەم تایبەتە بە (جیاکردنەوە) و قۆناغی دووەمیش بریتییە لە (گواستنەوە).
لە ڕوونکردنەوەکەدا هاتووە کە لەم کاتەدا تەنیا قۆناغی یەکەم (جیاکردنەوە) کارایە. ئەمەش بەو واتایە دێت کە پیاوان دەتوانن داواکاری بۆ جیاکردنەوەی فۆرمەکانیان پێشکەش بکەن و فۆرمێکی نوێ و سەربەخۆ بۆ خۆیان دروست بکەن. هەروەها، ئەگەر ئەو خێزانە نوێیانە منداڵیان هەبێت، دەتوانن ناوەکانیان بخەنە سەر فۆرمە نوێیەکە، تەنانەت ئەگەر پێشتریش لەسەر فۆرمی ماڵی باپیریان تۆمار کرابن. بەڵام بۆ زیادکردنی ناوی خێزان (هاوسەرەکە) یان دایکی منداڵەکان بۆ سەر فۆرمە نوێیەکە، پێویستە هاووڵاتییان چاوەڕێ بکەن تاوەکوو قۆناغی دووەم، کە خزمەتگوزاریی "گواستنەوە"یە، کارا دەکرێت.
لەلایەکی دیکەوە، کاروان ڕەسووڵ، بریکاری خۆراک لە شاری هەولێر، لە لێدوانێکی ڕۆژنامەوانیدا پشتڕاستی ئەم ڕێکارانەی کردەوە و ڕایگەیاند کە پڕۆسەکە بەو شێوەیەیە کە سەرەتا ناوی کەسەکە لە خێزانەکەی دەردەهێندرێت و فۆرمێکی جیاوازی بۆ دەکرێتەوە. دواتر لەگەڵ کارابوونی سیستەمی گواستنەوەی تاک، ناوی هاوسەرەکەشی لە فۆرمی ماڵی باوکییەوە بۆ سەر فۆرمە نوێیەکە دەگوازرێتەوە.
سەبارەت بە مەرجە یاسایی و کارگێڕییەکان، ئەو بریکارە ئاماژەی بەوە کرد کە هەبوونی کارتی نیشتمانی و بەڵگەنامەی گرێبەستی هاوسەرگیری (عەقد زەواج) مەرجی سەرەکین. وردەکاریی مەرجەکانیش بەم شێوەیەیە:
- ئەگەر کارتی نیشتمانییان نوێ کرابێتەوە: ئەگەر هاوسەرەکان هەردووکیان کارتی نیشتمانییان نوێ کردبێتەوە و خاوەنی هەمان ژمارەی خێزانی بن، ئەوا پێویست بە پەسەندکردن (تەسدیق)ی گرێبەستی هاوسەرگیری ناکات بۆ ساڵی ٢٠٢٦، و کۆنیی گرێبەستەکەش کێشە دروست ناکات.
- ئەگەر کارتی نیشتمانییان نوێ نەکردبێتەوە: لە حاڵەتێکدا ئەگەر کارتەکانیان نوێ نەکردبێتەوە و ژمارەی خێزانییان جیاواز بێت، ئەوا دەبێت پێش دەستپێکردنی ڕێکارەکانی جیاکردنەوەی فۆرمی خۆراک، سەردانی فەرمانگەکانی باری شارستانی بکەن بۆ نوێکردنەوەی کارتەکانیان و یەکخستنی ژمارەی خێزانی، یانیش دەبێت گرێبەستی هاوسەرگیرییەکەیان بۆ ساڵی ٢٠٢٦ پەسەند (تەسدیق) بکەنەوە.