مەسعود حەیدەر، بریکاری پێشووی وەزارەتی دارایی عێراق، داوا لە سەرۆک وەزیران و سەرۆکی دەسەڵاتی دادوەری دەکات دەستەی دەستپاکی و دامەزراوە چاودێرییەکان ڕابسپێرن بۆ ئەنجامدانی وردبینی و پێداچوونەوەیەکی گشتگیر بە سەرجەم ئەو نووسراو، بڕیار و ڕێکارانەی کە لە سەرەتای دەستبەکاربوونی کابینەکەی محەمەد شیاع سودانییەوە تا ئێستا لە وەزارەتی دارایی دەرچوون.
ئاوێنە: حەیدەر لە ڕاگەیەندراوێکدا ئاماژەی بەوە کردووە، پێویستە ئەم لێکۆڵینەوەیە بە تایبەت ئەو بەش و فەرمانگانە بگرێتەوە کە پەیوەندی ڕاستەوخۆیان بە خەرجی و بڕیارە داراییەکانەوە هەیە، بەتایبەت "فەرمانگەی بودجە، فەرمانگەی ژمێریاری، فەرمانگەی کارگێڕی و دارایی، فەرمانگەی یاسایی، خانوبەرەی دەوڵەت، لەگەڵ قەڵەمی نھێنیی نوسینگەی وەزیر".
بریکاری پێشووی وەزارەتی دارایی جەختی لەوە کردووەتەوە کە "تەنیا لە ڕێگەی وردبینییەکی پیشەیی و شەفافەوە دەتوانرێت ڕاستییەکان ئاشکرا بکرێن و وێنەیەکی ڕوون بۆ ڕای گشتی لەسەر ئەوەی لە وەزارەتی داراییدا ڕوویداوە، بخەینە ڕوو"، هاوکات وەزارەتەکەی بەوە تۆمەتبار کردووە کە لە ماوەی ڕابردوودا "وەک وەزارەتێکی پۆلیسی" کاری کردووە.
لە بەشێکی تری پەیامەکەیدا، مەسعود حەیدەر ئاماژەی بەوە کردووە کە بەڕێوەبردنی عێراق ناکرێت لەسەر بنەمای پەراوێزخستن و دوورخستنەوە بێت، بەڵکو دەبێت لەسەر بنەمای "شەراکەتی ڕاستەقینە، دادپەروەری، سەروەریی یاسا و شەفافییەت" بنیاد بنرێت. ناوبراو پێی وایە لە ئەنجامی ئەم پێداچوونەوەیەدا، ڕوونی دەبێتەوە کە چۆن "ملیاران دۆلار" لەو ماوەیەدا خەرجکراون.