چوارچێوەی هەماهەنگیی شیعهكان جەخت لە پاڵپشتیکردنی هەوڵەکانی بەرەنگاربونەوەی گەندەڵی و پڕۆسهی ههڵمهتی بەرەبەیان دهكاتهوهو دهشڵێت، پێویسته ئەو هەوڵانە و پاککردنەوەی دامەزراوەکانی دەوڵەت لە گەندەڵکاران بهردهوام بن و بەهەدەردانی سامانی گشتییش رابگیرێت.
ئاوێنه: چوارچێوهی ههماههنگیی شیعهكان، ئهمشهو دوشهممه، له راگهیهندراوێكدا وتی، چوارچێوەكه لە نوسینگەی عەبدولحسێن موسەوی، سەرۆکی هاوپەیمانی نههجی نیشتمانی بە ئامادەبونی عەلی زەیدی، سەرۆک وەزیران كۆبوهوه.
بەپێی راگهیهندراوهكه، له كۆبونهوهدا چوارچێوەی هەماهەنگی داوای لە لایەنگرانی خۆی کرد کە بەشدارییەکی بەرفراوان بکەن لە بەڕێکردنی تەرمی عهلی خامنەیی، رێبهری پێشوی ئێران كه بڕیاره له عێراقیش بهڕێوهبچێت.
وهك له راگهیهندراوهكهدا هاتوه، چوارچێوەی هەماهەنگی جەختی لەسەر پاڵپشتیکردنی هەوڵەکانی بەرەنگاربونەوەی گەندەڵی و پڕۆسهی ههڵمهتی بهرهبهیان كردهوهو ئامادهبوانی كۆبونهوه پشتگیری و هاوسۆزی خۆیان بۆ هەنگاوەکانی حکومەت و دەسەڵاتی دادوەری دەربڕی کە متمانە بۆ پرۆسەی سیاسی دەگێڕێتەوەو جەختیشیان لەسەر پێویستی بەردەوامبونی ئەو هەوڵانە و پاککردنەوەی دامەزراوەکانی دەوڵەت لە گەندەڵکاران و کەمتەرخەمەکان و ڕاگرتنی بەهەدەردانی سامانی گشتی کردەوە.