لە کۆبوونەوەی خولیی ژمارە (٢٨٢)ـدا کە بە ئامادەبوونی عەلی زەیدی، سەرۆک وەزیرانی عێراق بەڕێوەچوو، ئەمیندارێتی گشتیی چوارچێوەی هەماهەنگی هەڵوێستی خۆی لەسەر دوو دۆسیەی گرنگی پەیوەست بە دۆخی ناوخۆیی و هەرێمی ڕاگەیاند.
ئاوێنە: لە ڕاگەیەندراوێکدا، چوارچێوەی هەماهەنگی بە توندی پشتیوانی خۆی بۆ هەنگاوەکانی حکومەت و دەسەڵاتی دادوەری لە چوارچێوەی پرۆسەیەک بە ناوی "ئۆپەراسیۆنی بەرەبەیان" دەربڕی. لایەنەکە جەختی لەوە کردەوە کە ئەو ڕێکارانە متمانە بۆ پرۆسەی سیاسی دەگەڕێنێتەوە، داواشیکرد بەردەوامی بەو هەوڵانە بدرێت بە ئامانجی پاککردنەوەی دامەزراوەکانی دەوڵەت لە گەندەڵکاران و کەمتەرخەمەکان، هەروەها ڕێگریکردن لە بەهەدەردانی ماڵی گشتی.
جێگای ئاماژەیە، بەرەبەیانی ڕۆژی یەکشەممە هەڵمەتێکی فراوانی دەستگیرکردن دەستیپێکرد کە ژمارەیەک بەرپرسی سیاسی، پەرلەمانتار و بازرگانی گرتووەتەوە. عەلی زەیدی، سەرۆک وەزیران، ئەو هەڵمەتەی بە "قۆناغی یەکەم" لە ڕێکارە بەرفراوانەکان بۆ گێڕانەوەی ماڵی گشتی وەسف کردووە و دەزگا چاودێرییەکانی ڕاسپاردووە بەدواداچوونی ورد بۆ سەرجەم کەیسەکانی گەندەڵی بکەن.
سەبارەت بە دۆسیەی هەرێمی، چوارچێوەی هەماهەنگی داوای لە لایەنگرانی کردووە بەشدارییەکی بەرفراوان لە ڕێوڕەسمی بەڕێکردنی تەرمی عەلی خامنەیی، ڕێبەری پێشووی ئێراندا بکەن کە بڕیارە لەسەر خاکی عێراق بەڕێوەبچێت.
حکومەتی عێراق ڕەزامەندی لەسەر داواکارییەکەی ئێران بۆ سازکردنی ئەو ڕێوڕەسمە لە ڕۆژی ٨ی تەمموزی داهاتوو دەربڕیوە. لە ئێستاشدا وەفدەکانی ئێران گەیشتوونەتە پارێزگاکانی نەجەف و کەربەلا بەمەبەستی ئەنجامدانی ئامادەکارییەکان و دیاریکردنی وردەکارییەکانی ڕێوڕەسمەکە، لەکاتێکدا چوارچێوەی هەماهەنگی پەرۆشی خۆی بۆ بەشدارییەکی کارا لەو ڕێوڕەسمە نیشانداوە.