ئامادەکاری بۆ دابەشکردنی بەشە ئاردی هاووڵاتیان دەستی پێ کردووە و بەپێی بەرپرسان، زۆربەی ئەو ئاردەی بۆ ئەم مانگە دابین دەکرێت، لە گەنمی بەرهەمهاتووی ئەمساڵ دروستکراوە.
ئاوێنە: ئەمڕۆ دووشەممە (27ی تەمووز)، شوان شوانی، خاوەنی ئاش، ڕاگەیاند کە بەشێکی زۆری ئاردی ئامادەکراو بۆ ئەم مانگە لە گەنمی ئەمساڵ بەرهەم هاتووە و بەپێی وتەکەی، ئەم گەنمە لە ڕووی کوالێتییەوە لە ئاستێکی باشدایە.
بەپێی ڕوونکردنەوەکەی، گەنمی ئەمساڵ بەهۆی گونجاوی دۆخی کەشوهەوا لە ماوەی وەرزی چاندندا، کێشەی بەرچاوی تێدا نەبووە. هەروەها دەنکی گەنم بە تەواوی تێرئاو بووە، ئەوەش وای کردووە کەپەکی کەمتر هەبێت و ئاردی بەرهەمهاتوو لە ڕووی هێز و کوالێتییەوە باشتر بێت بەراورد بەو ئاردەی لە گەنمی ساڵی ڕابردوو دروست دەکرا.
لە هەمان کاتدا، قایمقامییەتی ڕانیە لە ئاگادارکردنەوەیەکدا ڕایگەیاندووە کە ئاردی کوالێتی بەرز گەیشتووە و لە ڕۆژانی داهاتوودا دەست بە دابەشکردنی دەکرێت.
لە ئاگادارکردنەوەکەدا داوای لە هاووڵاتیان کراوە تەنها ئەو ئاردە وەربگرن کە مێژووی 23ی 7 و دوای ئەو لەسەر تۆمارکراوە.
قایمقامییەتی ڕانیە هەروەها ئاماژەی بەوە کردووە کە ئاردەکە کوالێتییەکی بەرزی هەیە و گونجاوە بۆ دروستکردنی نان. لە کۆتاییدا هۆشداری داوە کە ئەگەر هەر بریکارێک ئاردی کۆن بە هاووڵاتیان بدات یان ئاردی نوێ بفرۆشێتەوە، هاووڵاتیان ئاگاداری دەسەڵاتە پەیوەندیدارەکان بکەنەوە تا ڕێکاری یاسایی پێویست بەرانبەری بگیرێتەبەر.