ڕاوێژکاری دارایی سەرۆکی وەزیران ڕایگەیاند، پلانێکی حکومی داڕێژراوە بۆ بەرزکردنەوەی داهاتە نا نەوتییەکان بۆ ٤٦٪ لە ماوەی ١٠ ساڵدا، حکومەت لە هەوڵدایە بۆ بەهێزکردنی بەشداریی کەرتی تایبەت بۆ ٥٤٪ لە کۆی بەرهەمی ناوخۆیی و جێبەجێکردنی پڕۆژە ستراتیژییەکانی کە کاریگەری ڕاستەوخۆیان لەسەر گەشەپێدانی ناوخۆیی هەیە.
ئاوێنە: مەزهەر محەمەد ساڵح ڕاوێژکاری دارایی عەلی زەیدی سەرۆکی وەزیرانی عێراق، سەبارەت بە پلان و هەوڵەکانى حکومەت بۆ بەرزکردنەوەى داهاتى نانەوتى، بۆ میدیا عێراقییەکان ڕاگەیاند، سیاسەتی دارایی حکومەت لە ماوەی ١٠ ساڵی داهاتوودا لە ڕێگەی هەمەجۆرکردنی سەرچاوەکانی داهات و بەهێزکردنی ڕۆڵی کەرتی تایبەت لە ئابووری نیشتیمانیدا، ئامانجی بەدیهێنانی سەقامگیری ئابووری و گەشەپێدانی بەردەوامە.
ئاماژەی بەوەشکرد، حکومەتیش بەردەوام دەبێت لە جێبەجێکردنی ڕێکارەکانی لە ڕێگەی بودجەوە، بە داڕشتنەوەی پێکهاتەی خەرجی و داهاتە گشتییەکان، بە جۆرێک کە بەشدار بێت لە ڕێکخستنەوەی ئابووری ڕاستەقینە لەسەر ئاستی گشتی.
باسی لەوەشکرد، ڕێڕەوی دارایی لە ماوەی ١٠ ساڵی داهاتوودا دوو ئامانجی سەرەکی دەپێکێت؛ یەکەمیان هەمەجۆرکردنی سەرچاوەکانی داهاتی نانەوتییە تا بگاتە نزیکەی ٤٦٪ لە کۆی داهاتە گشتییەکان، بەراورد بەوەی کە لە ئێستادا لە ١٠٪ یان کەمتر تێپەڕ ناکات، ئامانجی دووەم بریتییە لە بەرزکردنەوەی بەشداری کەرتی تایبەت لە کۆی بەرهەمی ناوخۆییدا لە ٣٧٪ بۆ ٥٤٪ لە ماوەى١٠ ساڵەی داهاتوودا.
وتیشی: ئامانجێک دیکە کەمکردنەوەی ڕێژەی بێکارییە بۆ نزیکەی ٣٪ لە کاتێکدا ئێستا ڕێژەکە ١٣٪ـە.
ئەوەشی خستەڕوو، بووژاندنەوەی کەرتە بەرهەمهێنەرەکان، بەرفراوانکردنی بنکەی وەبەرهێنان، جێبەجێکردنی پڕۆژە ستراتیژییەکانی کە کاریگەری ڕاستەوخۆیان لەسەر گەشەپێدانی ناوخۆیی هەیە، پایەی بنەڕەتین بۆ ڕەخساندنی دەرفەتی کاری بەردەوام.