باڵیۆزخانەی ئەمریکا لەبەغدا ڕایدەگەیەنێت، عێراق بەهۆی چالاکیی گروپە چەکدارەکان و ململانێ سەربازییەکانەوە لەئاستی چوارەمی مەترسیدایە.
باڵیۆزخانەی ئەمریکا لەبەغدا، لەڕاگەیەندراوێكدا، جارێکی دیکە هاوڵاتییانی وڵاتەکەی لەگەشتنەکردن بۆ عێراق ئاگادار کردەوەو ئاماژەی بەوەشکرد کە هێرشی گروپە چەکدارەکانی نزیک لەئێران لەعێراق و ناوچەکە، مەترسییەکی گەورە بۆ سەر سەلامەتیی گشتی دروست دەکەن، ئەمەش وایکردوە عێراق لەلیستی ئەو وڵاتانەدا بمێنێتەوە کە گەشتکردن بۆیان قەدەغەیە.
باڵیۆزخانەی ئەمریکا داوا لەو هاوڵاتیانە ئەمریکییانە دەکات کە ئێستا لەناو خاکی عێراقدان، لەوپەڕی وریاییدا بن و دەشڵێت، بەردەوام چاودێریی میدیا ناوخۆییەکان بکەن و بەتەواوی پابەندی ڕێنماییەکانی دەسەڵاتدارە ئەمنییەکان بن بۆ پاراستنی گیانیان لەهەر پێشهاتێکی کتوپڕ.
بەگوێرەی ڕاگەیەندراوەکە، عێراق هێشتا لەژێر هۆشداریی گەشتکردنی ئاستی 4ـدایە، کە بە واتای "گەشت مەکەن" دێت. ئەم بڕیارە لەسەر بنەمای مەترسییەکانی تیرۆر، ڕفاندن، ململانێی چەکداری و ئاڵۆزییەکانی ناوخۆ دراوە. هەروەها باڵیۆزخانە جەختی كردوتەوە، کە توانای حکومەتی ئەمریکا بۆ پێشکەشکردنی خزمەتگوزارییە فریاگوزارییەکان بەهاوڵاتییانی لەناوخۆی عێراقدا زۆر سنوردارە.
ئاوێنە: باڵیۆزخانەی ئەمریکا هۆشداری دەدات لەئەگەری ڕاگرتنی گەشتە ئاسمانییەکان یان داخستنی کایەی ئاسمانی عێراق بەبێ ئاگادارکردنەوەی پێشوەختە، دەڵێت، بەزوترین كات خۆیان لەعێراق دوربخەنەوە. ئەمەش وەک ئاماژەیەک بۆ ناسەقامگیریی دۆخی ئەمنی و ئەگەری پەرەسەندنی ململانێ سەربازییەکان لەکات و ساتێکی نادیاردا.
ئەم هۆشدارییە نوێیەی باڵیۆزخانەی ئەمریکا لە کاتێکدایە، کە بەرەبەیانی ئەمڕۆ چوارشەممە فڕۆکە جەنگییەکانی ئەمریکاو سعودیە زنجیرەیەک بۆردومانی چڕیان کردە سەر بارەگاکانی حەشدی شەعبی لەچەندین پارێزگای جیاوازی عێراق.