سەباح نوعمان، وتەبێژی فەرماندەی گشتی هێزە چەکدارەکانی عێراق ڕایگەیاند، هیچ بەڵگەیەک لەبەردەستدا نییە لەسەر ئەوەی لە خاکی عێراقەوە هێرش کرابێتە سەر وڵاتانی دراوسێ، ئەمەش دوای ئەوە هات کە سعودیە لە وەڵامی هێرشی میلیشیاکان بۆ سەر بەرژەوەندییەکانی، چەند بارەگایەکی ئەو گرووپانەی بەهاوکاری ئەمریکا بۆردومان کرد.
سەباح نوعمان ڕایگەیاند: “لە ئێستادا دامەزراوەی ئەمنی سەرقاڵی ئامادەکردنی پلانێکی ئەمنی تۆکمەیە بۆ ڕێگریشیکردن لە دووبارەبوونەوەی دەستدرێژییەکان و پاراستنی تەواوەتی سەروەریی عێراق”.
جەختیشی کردەوە کە “هێزە ئەمنییە فەرمییەکان بە تەنیا بەرپرسن لە دۆسیەی ئەمنی و ڕێگە بە بوونی هیچ چەکێک لە دەرەوەی چوارچێوەی دەوڵەت نادەن.”
ناوبراو ڕوونیشی کردەوە: “سەردانی سەرۆکی ئه‌نجومه‌نی وه‌زیران و فەرماندەی گشتیی هێزە چەکدارەکان، عەلی زەیدی بۆ بارەگای دەستەی حەشدی شەعبی و گوێگرتنی لە شیکارییەکی ورد سەبارەت بەو هێرشانەی کرابوونە سەر کارمەندانی دەستەکە لە چەند پارێزگایەکدا، سەلمێنەری ئەوەیە کە حەشدی شەعبی بەشێکی ڕەسەنە لە سیستەمی بەرگریی نیشتمانی.”
داواشی کرد “بەڵگە پێشکەش بکرێن سەبارەت بەو بانگەشانەی ئاماژە بە ئەنجامدانی هێرش لە ناوخۆی عێراقەوە دەکەن” و وتیشی: “تا ئێستا هیچ لایەنێک هیچ بەڵگەیەکی پێشکەش نەکردووە کە ئەوە بسەلمێنێت”، جەختیشی کردەوە کە “حکومەت ڕێگە بە هیچ ڕەفتارێکی تاکەکەسی لە ناوخۆوە نادات، و لە هەمان کاتدا هیچ پێشێلکارییەکیش کە لە دەرەوەی سنوورەکانەوە بێت قبوڵ ناکات”.