فالح ساری، وه‌زیری دارایی عێراق له‌باره‌ی هۆكاری دواكه‌وتنی موچه به په‌رله‌مانتارێكی راگه‌یاندوه، تاوه‌كو ئێستا سێ ترلیۆن و 300 ملیار دینار كورتهێنان بۆ دابه‌شكردنی موچه‌ی ئه‌م مانگه هه‌یه.
ئاوێنه: حه‌یده‌ر موته‌یری، ئه‌ندامی په‌رله‌مانی عێراق له راگه‌یه‌ندراوێكدا وتی، دوێنێ پێنجشه‌ممه سه‌ردانی فالح ساری، وه‌زیری دارایی عێراقی كردوه‌و تاوتوێی چه‌ند بابه‌تێكیان كردوه له‌سه‌رو هه‌مویشیانه‌وه بابه‌تی موچه و هۆكاری دواكه‌وتنی.
ئه‌و په‌رله‌مانتاره وتویه‌تی، له‌باره‌ی دواکەوتنی دابەشکردنی موچە، وەزیری دارایی ڕونی کردۆتەوە کە کورتهێنانێکی ڕاستەقینە لە پارەدا هەیە، بە جۆرێک موچەی (فەرمانبەران، خانەنشینان و چاودێریی کۆمەڵایەتی) مانگانە دەگاتە 7 تریلیۆن و 800 ملیار دینار.
وه‌ك ئه‌و په‌رله‌مانتاره ئاماژه‌ی پێداوه، وه‌زیری دارایی عێراق ئاماژه‌ی به‌وه‌داوه، چەند ڕۆژێک لەمەوبەر 3 تریلیۆن دینار بۆ موچه‌ی هەندێک لە وەزارەتەکان دراوە، لە ئێستادا تریلیۆنێک و نیو لە لای وەزارەتی دارایی بەردەستە و هەوڵ دەدرێت بگەیەنرێتە تریلیۆنێک و 650 ملیار دینار بە مەبەستی خه‌رجكردنی موچەی خانه‌نشینان، دوای ئەوەش هەوڵ دەدرێت پارە کۆبکرێتەوە بۆ پێدانی موچەی وەزارەت و دامەزراوەکانی دیكه.
وه‌زیری دارایی په‌رله‌مانتاره‌كه‌ی وتوه، واته كورتهێنانی ئێستا بۆ موچه‌ی ئه‌م مانگه‌ی نزیكه‌ی 3 تریلیۆن و 300 ملیار دیناره.