عه‌لی فالح زه‌یدی، سه‌رۆك وه‌زیرانی عێراق له ساڵیادی هێرشی داعش بۆ سه‌ر شه‌نگال رایگه‌یاند، دەوڵەت وەک زامنی مافەکانی هەمو ڕۆڵەکانی دەمێنێتەوە و بەردەوام دەبێت لە پاراستنی سەروەری عێراق و هێشتنەوەی چەک لە دەستی دەوڵەت و وشککردنی سەرچاوەکانی گەندەڵی و هەنگاونان بۆ چەسپاندنی ئاسایش، سەقامگیری، گەشەپێدان و دادپەروەری.
عه‌لی فالح زه‌یدی له په‌یامێكدا به زمانی كوردی له ساڵیادی هێرشی داعش بۆ سه‌ر شه‌نگال، رایگه‌یاند، "لە ساڵیادی ئەو جینۆسایدەی کە ڕێکخراوی تیرۆریستی داعش لە دژی گەلی ئێزیدیمان و هەمو پێکهاتەکانی دیکەی گەلەکەمان ئەنجامیدا، یەکێک لە قێزەونترین ئەو تاوانانە وەبیر دەهێنینەوە کە ویژدانی مرۆڤایەتی هەژاند".
ئاماژه‌ی به‌وه‌شكرد، "دوپاتی دەکەینەوە کە وەفا بۆ قوربانییەکان بە بەدیهێنانی دادپەروەری و ئاشکراکردنی چارەنوسی ڕفێندراوان و چاودێریکردنی ژنانی ڕزگاربو و ئاوەدانکردنەوەی شەنگال و دەستەبەرکردنی گەڕانەوەی خۆبەخشانە و ئارام و پڕشکۆ بۆ ئاوارەکان دەبێت".
سه‌رۆك وه‌زیرانی عێراق له راگه‌یه‌ندراوه‌كه‌دا ده‌ڵێت، "ئەم یادە ئازاربەخشە هاوکاتە لەگەڵ یادی چلەی ئیمام حوسێن (سەلامی خوای لێ بێت) و ئەو بەهایانەی کە هەڵیانگرتوە لە ڕوبەڕوبونەوەی ستەم و سەرخستنی حەق و ئاشتی، هەروەها قوربانیدانی هێزە ئەمنییەکانمان بە هەمو پێکهاتەکانییەوە و بە پاڵپشتی برایان و دۆستان و هاوپەیمانی نێودەوڵەتی لە بەدیهێنانی سەرکەوتن بەسەر داعشدا بەبیر دەهێنینەوە".
ئه‌وه‌شی خسته‌ڕو، "جەخت دەکەینەوە لەسەر ئەوەی کە دەوڵەت وەک زامنی مافەکانی هەمو ڕۆڵەکانی دەمێنێتەوە و بەردەوام دەبێت لە پاراستنی سەروەری عێراق و هێشتنەوەی چەک لە دەستی دەوڵەت و وشککردنی سەرچاوەکانی گەندەڵی و هەنگاونان بۆ چەسپاندنی ئاسایش، سەقامگیری، گەشەپێدان و دادپەروەری، بە شێوازێک کە شکۆی هەمو عێراقییەکان بپارێزێت و ڕێگر بێت لە دوبارەبونەوەی تاوانی لەم شێوەیە لە داهاتودا".
هێرشی داعش بۆ سەر شەنگال لە 3ی ئابی 2014دا ڕویدا و بوەهۆی کۆمەڵکوژی و جینۆسایدکردنی کوردانی ئێزیدی بە دەستی رێکخراوی داعش ئەو پەلامارە وەکو یەکێک لە دڕندەترین کارەساتە مرۆییەکانی سەدەی 21 دەناسرێت کە تێیدا هەزاران مرۆڤی بێتاوان بونە قوربانی.