وه‌زاره‌تی ده‌ره‌وه‌ی عێراق رایده‌گه‌یه‌نێت، ئه‌مڕۆ چوارشه‌ممه، فواد حسێن، وه‌زیری ده‌ره‌وه‌ی عێراق له‌گه‌ڵ هاوتا سعودیه‌كه‌ی، تاوتوێی ئاماده‌كارییه‌كانی تایبه‌ت به سه‌ردانی چاوه‌ڕوانكراوی وه‌فدێكی ئه‌منیی عێراقیان بۆ ئه‌و وڵاته كرد.
ئاوێنه: وه‌زاره‌تی ده‌ره‌وه‌ی عێراق له راگه‌یه‌ندراویكدا وتی، ئه‌مڕۆ چوارشه‌ممه، له عه‌مانی پایته‌ختی ئوردن، فواد حسێن، وه‌زیری ده‌ره‌وه له‌گه‌ڵ فه‌یسه‌ڵ بن فه‌رحان ئال سعود، وه‌زیری ده‌ره‌وه‌ی سعودیه كۆبوه‌ته‌وه.
به‌پێی راگه‌یه‌ندراوه‌كه، له كۆبونه‌وه‌كه‌دا هەردو لا تاوتوێی ئامادەکارییەكانی تایبه‌ت به سەردانی چاوەڕوانکراوی وه‌فدێكی ئه‌منیی عێراقییان بۆ سعودیه كرد، جگە لە گفتوگۆكردن له‌سه‌ر سەردانە ئاڵوگۆڕکراوەکانی نێوان هەردو لا لە ئاستە جیاوازەکاندا، بەجۆرێک کە هاوکار بێت لە بەهێزکردنی هاوکاری و هەماهەنگیی نێوان دو وڵات.
وه‌ك له راگه‌یه‌ندراوه‌كه‌دا هاتوه، له كۆبونه‌وه‌كه‌دا جەخت لەسەر گرنگیی بەهێزکردن و گەشەپێدانی پەیوەندییە دوقۆڵییەکانی نێوان عێراق و سعودیە کرایەوە، هەروەها چەندین پرسی جێی بایەخی هاوبەش تاوتوێ کران، لە سەرویانەوە ئامادەکارییەکانی پەیوەست بە سازدانی لوتکەی عەرەبی داهاتو.
وه‌زاره‌تی ده‌ره‌وه‌ی عێراق هێمای بۆ ئه‌وه‌ش كردوه كه له كۆبونه‌وه‌كه‌دا فواد حسێن، سیاسەتی حکومەتی عێراقی خستەڕو کە ئامانجی کۆنترۆڵکردن و هێشتنەوەی چەکە لە دەستی دەوڵەتدا" و "وەزیری دەرەوەی سعودیەش پشتیوانیی وڵاته‌كه‌ی بۆ حکومەتی نوێی عێراق دەربڕی، لەگەڵ پشتگیرییان بۆ ئەو هەوڵانەی دەدرێن لە پێناو بەهێزکردنی ئاسایشی عێراق و پاراستنی ئاسایش و سەقامگیریی ناوچەکە."
بەپێی راگه‌یه‌ندراوه‌كه، هەردو لا تاوتوێی "لێکەوتە ئه‌منییه‌كانی ناوچەکەیان کرد له‌گه‌ڵ ره‌نگدانه‌وه‌یان لەسەر دەروازەکانی هەناردەکردنی نەوت و ئاسایشی دابینکردنی وزە، هەروەها هەوڵە هەرێمییەکان و ئه‌گه‌ری ئه‌و لێكتێگه‌یشتانه‌یان تاوتوێ کرد کە ئامانجیان كردنەوەی گەروی هورمزە بەڕوی هاتوچۆی دەریاییدا."
هەردو لایەن جەختیان لەسەر "گرنگیی بەردەوامیی هەماهەنگی و کارکردنی هاوبەش لە چوارچێوەی کۆمکاری عەرەبی و چوارچێوە هەرێمییەکاندا کردەوە، بە شێوازێک کە خزمەت بە بەرژەوەندییە هاوبەشەکان بکات و ئاسایش و سەقامگیری لە ناوچەکەدا بەهێزتر بکات."