شەوی ڕابردوو، هاوپەیمانیی بەڕێوەبردنی دەوڵەت سی و حەوتەمین کۆبوونەوەی ئاسایی خۆی بە ئامادەبوونی سەرۆکی ئەنجومەنی وەزیران و نێچیرڤان بارزانی، سەرۆکی هەرێمی کوردستان ئەنجام دا. کۆبوونەوەکە تیشکی خستە سەر کۆی بارودۆخی سیاسی، ئەمنی، ئابووری، خزمەتگوزاری و پێشهاتە هەرێمییەکانی عێراق.
ئاوێنە: لە دەستپێکی کۆبوونەوەکەدا، سەرۆکی ئەنجومەنی وەزیران تیشکی خستە سەر هەوڵەکانی حکومەت لەپێناو بەهێزکردنی ئاسایش و سەقامگیری، باشترکردنی خزمەتگوزارییەکان، جێبەجێکردنی کارنامەی وەزاری، و ڕووبەڕووبوونەوەی ئاڵنگارییە ئابووری و داراییەکان، جەختیشی لەسەر ئەوە کردەوە کە پاراستنی بەرژەوەندییەکانی هاووڵاتییان لە کارە لەپێشینەکانی حکومەتە.
پاراستنی سەروەری و ڕەفتاری چەکدارانە
هاوپەیمانییەکە پشتگیریی تەواوی خۆی بۆ هەوڵەکانی پاراستنی ئاسایش، سەقامگیری و سنووردارکردنی چەک لە دەستی دەوڵەتدا دەربڕی؛ ئەمەش بەپێی ئەو کارنامە وەزارییەی کە پەرلەمانی عێراق دەنگی لەسەر داوە و بووەتە یاسایەکی بەرکار. هاوکات جەختیان لەوە کردەوە کە ڕێگری دەکرێت لە بەکارهێنانی خاکی عێراق وەک سەکۆیەک بۆ دەستدرێژیکردنە سەر وڵاتانی دراوسێ یان پەلکێشکردنی عێراق بۆ ناو ململانێ هەرێمییەکان. هاوپەیمانییەکە هۆشداری دا کە هەر کەس یان لایەنێک هەڵسوکەوتێکی لەو جۆرە ئەنجام بدات، بە تاوانی هەڕەشەکردن لە ئاسایشی وڵات هەژمار دەکرێت و ڕووبەڕووی یاسا دەبێتەوە.
سەبارەت بە پێشێلکارییە ئەمنییەکان، هاوپەیمانییەکە سەرکۆنەی ئەو دەستدرێژییانەی کرد کە کرانە سەر یەکە جیاوازەکانی هێزە چەکدارەکانی عێراق و بوونە هۆی کوژرانی ژمارەیەک لە کارمەندانیان. هاوکات داوای کرد پابەندبوون بە خشتەی کاتیی هەنگاوەکانی سنووردارکردنی چەک تا دوای ٣٠ـی ئەیلوولی ٢٠٢٦ بپارێزرێت، بە جۆرێک کە لە دوای ئەو بەروارەوە، هەر ڕەفتارێکی چەکدارانەی دەرەوەی چوارچێوەی دەوڵەت بە یاسای بەرەنگاربوونەوەی تیرۆر مامەڵەی لەگەڵدا بکرێت.
دۆسێی ئابووری و دارایی
لایەنی ئابووری و دارایی بەشێکی تری کۆبوونەوەکە بوو، تێیدا جەخت لەسەر گرتنەبەری ڕێوشوێنی پێویست بۆ دەستەبەردەوامیی خزمەتگوزارییەکان، پرۆژە سەرەکییەکان، هەمەجۆرکردنی دەروازەکانی هەناردەکردنی نەوت، بەهێزکردنی داهاتە نەوتییەکان، و ڕووبەڕووبوونەوەی دیاردەکانی بەفیڕۆدان، قاچاغچێتی و گەندەڵی کرایەوە.
دۆخەی ناوچەیی و پەیوەندییە دەرەکییەکان
لە تەوەری پێشهاتە هەرێمییەکاندا، هاوپەیمانیی بەڕێوەبردنی دەوڵەت پشتیوانیی خۆی بۆ هەوڵەکانی هێورکردنەوە و دیالۆگ لە ناوچەکەدا ڕاگەیاند، بەکارهێنانی هێزی لە چارەسەرکردنی ململانێکاندا ڕەتکردەوە و ئامادەیی عێراقی بۆ گێڕانی ڕۆڵێکی ئەرێنی لە نزیککردنەوەی تێڕوانینی لایەنەکان نیشان دا بە مەبەستی پاراستنی ئاسایشی هەرێمی.
هەروەها تاوتوێی بارودۆخی وڵاتانی دراوسێ کرا و جەخت لە گرنگیی بەهێزکردنی ئاسایشی سنوورەکان، ڕووبەڕووبوونەوەی تیرۆر، ماددە هۆشبەرەکان و تاوانی ڕێکخراو کرایەوە، لەگەڵ پەرەپێدانی پەیوەندییەکانی عێراق لەسەر بنەمای بەرژەوەندیی هاوبەش، ڕێزگرتن لە سەروەری و دەستوەرنەدان لە کاروباری ناوخۆیی.
لە کۆتایی کۆبوونەوەکەدا، هاوپەیمانییەکە داوای خێراکردنی تەواوکردنی پێکهێنانی حکومەت و ناردنی بەرنامەکەی بۆ ئەنجومەنی نوێنەران کرد بە مەبەستی تاوتوێکردن و پەسەندکردنی.