وەزارەتی ناوخۆی عێراق ڕای گەیاند کە هەڵمەتە بەردەوامەکان بۆ کۆنترۆڵکردنی چەکی بێمۆڵەت و دەرەوەی دەسەڵاتی دەوڵەت بەردەوامە، و لەم چوارچێوەیەدا دەست بەسەر هەزاران پارچە چەک و کەرەستەی سەربازیدا گیراوە.
ئاوێنە: بەپێی ئەو زانیارییانەی کە ئەمڕۆ هەینی (حەوتی ئابی 2026) لەلایەن وەزارەتی ناوخۆی عێراقەوە بڵاو کراونەتەوە، لە قۆناغی کۆتایی ئۆپەراسیۆنەکاندا دەست بەسەر دوو هەزار و 797 پارچە چەکدا گیراوە، بەمەش کۆی گشتیی ئەو چەکانەی کە تا ئێستا لە چوارچێوەی ئەم هەڵمەتەدا دەستیان بەسەردا گیراوە، گەیشتووەتە 16 هەزار و 616 پارچە چەکی جۆراوجۆر.
هەروەها، ئامارە فەرمییەکان دەریدەخەن کە هێزە ئەمنییەکان توانیویانە دەست بەسەر 325 مووشەک و بۆمب، لەگەڵ هەزار و 72 کیڵۆگرام تەقەمەنی جۆراوجۆردا بگرن. سەبارەت بەو چەکانەی کە لەلایەن هاووڵاتییانەوە بە شێویەکی فەرمی لەلای لایەنە پەیوەندیدارەکان تۆمار کراون، وەزارەتەکە ئاماژەی بەوە کردووە کە زۆربەیان چەکی سووکن و ژمارەی گشتییان گەیشتووەتە 20 هەزار و 792 چەک.
جێگەی باسە، دۆسیەی بوونی چەک لە دەرەوەی چوارچێوەی دەسەڵاتی دەوڵەت لە عێراق یەکێکە لە ئاستەنگە گەورەکان، بە جۆرێک کە ملیۆنان پارچە چەک بە دست هێزە جۆراوجۆرەکان و هۆزەکانەوە دابەش بووە، و ئامارە بڵاوکراوەکانی ئێستای وەزارەتی ناوخۆش زیاتر ئەو چەکانە لەخۆ دەگرن کە پێشتر لە دەست هاووڵاتییاندا بوون.