بەرەی مقاوەمەی عێراق لە ڕاگەیەندراوێکدا ئاشکرایکرد، کە بڕیاربوو لە ئەمڕۆدا زنجیرەیەک هێرش دژی بەرژەوەندییەکانی ئەمریکا و سعودیە ئەنجام بدەن، بەڵام لەسەر داوای هادی عامری، ئەمینداری گشتیی ڕێکخراوی بەدر، و ڕەچاوکردنی هەڵوێستی ئەرێنیی بەشێک لە سەرکردە سیاسییەکان، بڕیاریان داوە جێبەجێکردنی ئەو هێرشانە دوابخەن.
ئاوێنە: لە بەشێکی تری ڕاگەیەندراوەکەدا، بەرەی مقاوەمە هەڵوێستی توندی لەسەر پرسی خوێنی قوربانیان نیشانداوە و جەختیکردووەتەوە کە "خوێنی پاکی شەهیدان کاڵا نەبووە و نابێتە کاڵایەک لە بازاڕی هاوسەنگی سیاسیدا." هەروەها پەیامێکی ڕەخنەگرانی ئاراستەی سەرکردە سیاسییەکان کردووە و دەڵێت: "داوا لەو کەسانە دەکەین کە کورسی و دەسەڵات کوێری کردوون و بێدەنگن لەئاست خوێنی شەهیدان و سەروەری پێشێلکراو، بە خۆیاندا بچنەوە و بگەڕێنەوە هۆشی خۆیان."
لە کۆتایی پەیامەکەیدا، بەرەی مقاوەمە هۆشدارییەکی توندی بە ئەمریکا و هاوپەیمانەکانی داوە و ڕایگەیاندووە کە خوێنی شەهیدان و بریندارەکان سەرچاوەی وزە و خۆڕاگرییانە. جەختیشی لەوە کردووەتەوە کە پاراستن و گەڕاندنەوەی سەروەریی وڵات تەنها بە بەیاننامەی شەرمەزارکەر بەدی نایەت، بەڵکو پێویستی بە هێز و پێداگریی ئەو لایەنانەیە کە سازش لەسەر خاک و کەرامەت ناکەن.