ئەمڕۆ، فالح سەاری، وەزیری دارایی عێراق، پێشوازی لە نزار ناسر حسێن، پارێزگاری بانکی ناوەندیی عێراق کرد و لە کۆبوونەوەیەکی هاوبەشدا دۆخی دارایی و ئابووریی وڵات و ئاڵەنگارییە بەردەوامەکانیان تاووتوێ کرد، کۆبوونەوەکە لە کاتێکدایە کە بەهۆی کورتهێنانی نەختینەوە، دابەشکردنی مووچەی فەرمانبەرانی دەوڵەت بۆ ئەم مانگە چەند ڕۆژێک دواکەوتووە و ئەمەش نیگەرانی و ناڕەزایەتیی لێکەوتووەتەوە، لە بەرامبەریشدا شارەزایانی ئابووری چەند پێشنیارێکیان بۆ تێپەڕاندنی قەیرانەکە خستووەتەڕوو، لەوانە پرسی چاپکردنی دراو.
ئاوێنە: لە ڕاگەیاندراوی فەرمیی وەزارەتی دارایی سەبارەت بە ناوەڕۆکی کۆبوونەوەکەدا هاتووە، هەردوولا جەختیان لە گرنگیی بەهێزکردنی هەماهەنگیی نێوان سیاسەتی دارایی و نەختینەیی کردووەتەوە، بە جۆرێک ببێتە هۆی بەڕێوەبردنی کارای گرفتە داراییەکان و مسۆگەرکردنی جێبەجێکردنی پابەندییە سەرەکییەکانی دەوڵەت، لە سەرووی هەمووشیانەوە دابینکردنی شایستە داراییەکانی مووچەخۆران، هاوکات بەردەوامبوون لە پرۆسەی چاکسازیی سیستەمی دارایی و پەرەپێدانی ئامرازەکانی بەڕێوەبردنی دارایی گشتی بە ئامانج گرتووە.
لای خۆیەوە، وەزیری دارایی جەختی لەسەر پێویستیی بەهێزکردنی ئاڵوگۆڕی داتا و زانیاری لە نێوان هەردوو دەزگادا کردەوە، لەگەڵ خێراکردنی پرۆسەی داتاڤیجتاڵکردن و بە دیجیتالکردنی سیستەمەکان، بە ئامانجی بەرزکردنەوەی ئاستی کارایی دامەزراوە داراییەکان و زیادکردنی توانایان بۆ وەڵامدانەوەی خێرای گۆڕانکارییە ئابوورییەکان.
هاوکات، پارێزگاری بانکی ناوەندی ڕوونی کردەوە کە بانکی ناوەندی بەپێی نەخشەڕێگا و سیاسەتەکانی خۆی، سەرنجی لەسەر پشتیوانیکردنی سەقامگیریی نەختینەیی، پەرەپێدانی کەرتی بانکی و هاوسەنگیی لەگەڵ پێداویستییە گشتییەکانی ئابووریی نیشتیمانی چڕ کردووەتەوە، و جەختیشی لە گرنگیی بەردەوامبوونی ڕاوێژ و هەماهەنگی لەگەڵ وەزارەتی دارایی لە سەرجەم پرسیار و دۆسیە ئابوورییەکاندا کردەوە.
لە کۆتایی کۆبوونەوەکەدا، هەردوولا ڕێککەوتن لەسەر بەردەوامبوونی کاری هاوبەش بۆ گرتنەبەری ئەو ڕێکارە کردەییانەی کە زامنی بەهێزکردنی سەقامگیریی دارایی و نەختینەیی دەکەن لە پێناو مسۆگەرکردنی بەردەوامیی پابەندییە داراییەکانی دەوڵەت لە قۆناغی داهاتوودا.