بەپێی ئەو بەڵگەنامە فەرمییانەی کە لەلایەن دەسەڵاتی دادوەرییەوە بڵاوکرابوونەوە، دادگای لێکۆڵینەوەی گەندەڵی ناوەندی لە کەرخ داوایەکی فەرمی ئاراستەی ئەنجومەنی نوێنەران کردووە بۆ هەڵگرتنی پارێزبەندی لەسەر ئەندامی پەرلەمان (نازم دەویج ئەسەدی). ئەم ڕێکارە یاساییە لەسەر بنەمای بوونی گومان و تێوەگلانی ناوبراو لە تاوانی بەدەستهێنانی قازانج و بەرژەوەندی ڕاستەوخۆ لە گرێبەست و کاری وەزارەتی کار و کاروباری کۆمەڵایەتی هاتووە.
ئاوێنە: لێکۆڵینەوە ئەنجامدراوەکانی دادگا دەریانخستووە کە ناوبراو لە ڕێگەی ڕێککەوتنی پێشوەختە لەگەڵ وەزیری پێشووی کار و کاروباری کۆمەڵایەتی و بە هاوکاریی کەسێکی تر، هەستاون بە دامەزراندنی کۆمپانیایەک بە ناوی (التداعی بۆ بازرگانیی گشتی و تەکنۆلۆژیای زانیاری و بەڵێندەرایەتیی گشتیی سنووردار) و تۆمارکردنی بە ناوی کەسێکی تری وەکو دەستسارێژکراو (سامر شاكر هاشم)ـەوە. ئامانج لەم کارەش تێوەگلاندنی کۆمپانیاکە بووە لە وەرگرتن و تێپەڕاندنی ئەو گرێبەستانەی کە لەلایەن وەزارەتی کار و کاروباری کۆمەڵایەتییەوە ئەنجام دراون، لەوانەش گرێبەستەکانی تایبەت بە کاتی ١٥ی کانونی دووەمی ٢٠٢٥ و ١٩ی تشرینی دووەمی ٢٠٢٥ سەبارەت بە دەستەبەرکردنی مۆڵەتی تایبەت بۆ دامەزراندن و هێنانی کرێکاری بیانی بۆ عێراق.
لە ئەنجامی ئەم بەدواداچوونانە، دادگا، بۆ مەبەستی بەردەوامبوون لە ڕێکارە یاساییەکان و جووڵاندنی دعوا لە دژی ناوبراو بەپێی ماددەی (٣١٩) لە یاسای سزادانی عێراقی ژمارە (١١١) ساڵی ١٩٦٩ی هەموارکراو، داوای لە پەرلەمان کردووە کە بەپێی ماددەی (٦٣)ی دەستوور، ڕەزامەندی لەسەر هەڵگرتنی پارێزبەندی لەسەر ناوبراو بدات.