بە گوێرەی تازەترین ریزبەندیی پاسپۆرتەكانی دونیا بۆ ساڵی 2026، پاسپۆرتی عێراقی سێیەم لاوازترینە لەسەر ئاستی جیهاندا.

ئاوێنە: ریزبەندیی (هینلی) بۆ پاسپۆرت، داتای ساڵی 2026ی بە فەرمی بڵاو كردەوە كە تێیدا دەردەكەوێت پاسپۆرتی عێراقی، بۆ مانگی ئابی ئەمساڵ، سێیەم لاوازترین پاسپۆرتە و هەڵگرانی تەنیا دەتوانن بچنە نێو 28 وڵاتی دونیا بەبێ لێدانی ڤیزای پێشوەختە یانیش لێدانی ڤیزا لە كاتی گەیشتن.

هەر بەپێی ڕیزبەندییەكە، پێش عێراق، سووریا بە پلەی دووەم دێت كە هەڵگرانی پاسپۆرتی ئەو وڵاتە تەنیا دەتوانن بچنە 25 وڵات بەبێ ڤیزا، هەروەها ئەفغانستانیش لە ڕیزبەندیی یەكەمی لاوازترین پاسپۆرتی دونیادایە كە هەڵگرانی تەنیا بۆیان هەیە بەبێ ڤیزا بچنە 22 دەوڵەتی دونیا. لە دوای عێراقیش، هەریەك لە پاكستان و یەمەن دێت كە هەڵگرانی پاسپۆرتی یەكەم دەتوانن بەبێ ڤیزا بچنە 29 دەوڵەت و دووەمیش دەتوانن بەبێ ڤیزا بچنە 30 دەوڵەت.

بە گوێرەی ئەو ڕیزبەندییە، هەڵگرانی پاسپۆرتی سۆماڵ چانسی گەشتكردنیان بەبێ ڤیزا زیاترە و دەتوانن بچە 32 دەوڵەت، هەڵگرانی پاسپۆرتی نیپاڵیش دەتوانن بچنە 34 دەوڵەت و هی كۆریای باكووریش 35 و ئێران 37 دەوڵەت، ئەریتریاش لە ڕیزبەندیی دەیەمدایە كە هەڵگرانی پاسپۆرتەكەی دەتوانن بچنە 38 دەوڵەت.

ڕیزبەندیی (هینلی) لە دیارترین ڕیزبەندییەكانی جیهانە بۆ پێوانەكردنی هێزی پاسپۆرتی وڵاتان كە پشت بە تازەترین داتاكانی یەكێتیی نێودەوڵەتی بۆ گواستنەوەی ئاسمانی (IATA) دەبەستێت.