وەزارەتی تەندرووستیی عێراق بەرنامەیەکی نوێی بەرپرسیارێتیی کۆمەڵایەتیی تایبەت بە کەرتی تەندرووستیی ئەهلی ڕاگەیاند، کە ئامانج لێی کەمکردنەوەی باری قورسی ئابووری لەسەر شان و شانی چینە هەژار و کەمدەرامەتەکانی کۆمەڵگە و دابینکردنی چارەسەری پزیشکیی پێویستە بۆیان.
ئاوێنە: عەبدولحسێن موسەوی، وەزیری تەندرووستیی عێراق، لە ڕاگەیەنراوێکدا وردەکاریی ئەم هەنگاوەی خستەڕوو کە لە ڕێگەی ئاژانسی هەواڵی عێراقییەوە بڵاوکرایەوە. بەگوێرەی ڕێنماییە نوێیەکان، سەرجەم نەخۆشخانە ئەهلییەکانی وڵات پابەند دەکرێن بەوەی هەفتانە لانیکەم یەک نەشتەرگەریی پزیشکی بە شێوەیەکی سەرتاپا خۆڕایی بۆ نەخۆشە کەمدەرامەتەکان ئەنجام بدەن.
پڕۆژەکە بە هاوبەشی و بەشداریکردنی نزیکەی ٣٠٠ نەخۆشخانەی ئەهلی لە سەرانسەری عێراقدا جێبەجێ دەکرێت، و پێشبینی دەکرێت لە ڕێگەی ئەم هاوکارییە هاوبەشەی نێوان کەرتی گشتی و تایبەتەوە، مانگانە نزیکەی ١٠٠٠ نەشتەرگەریی خۆڕایی بۆ توێژە شایستەکان دابین بکرێت.
لای خۆیەوە، وەزارەتی تەندرووستی جەختیکردەوە کە تەواوی پڕۆسەکە لە ژێر چاودێر و هەماهەنگیی ڕاستەوخۆی وەزارەتەکەدا بەڕێوەدەچێت، بە پشتبەستن بە ڕێنمایی ورد و تۆکمە، بۆ ئەوەی دڵنیایی تەواو بکرێت لەوەی خزمەتگوزارییە تەندرووستییەکان تەنها و تەنها دەگەنە دەست ئەو کەسانەی کە بە ڕاستی پێویستیان پێیەتی.