عه‌لی زه‌یدی، سه‌رۆك وه‌زیران و نوری مالیكی، سه‌رۆكی هاوپه‌یمانیی ده‌وڵه‌تی یاسا كۆبونه‌وه‌و تاوتوێی چه‌ند پرسێكیان كرد له‌وانه، روبه‌ڕوبونه‌وه‌ی گه‌نده‌ڵی و كۆنترۆڵكردنی چه‌ك له‌ده‌ستی ده‌وڵه‌تدا.
ئاوێنه: به‌پێی راگه‌یه‌ندراوێكی نوسینگه‌كه‌ی، ئه‌مڕۆ پێنجشه‌ممه، عه‌لی زه‌یدی، سه‌رۆك وه‌زیران، پێشوازی لە نوری مالیكی، سەرۆکی هاوپەیمانیی دەوڵەتی یاسا کردو لە کۆبونەوەی نێوانیاندا تاوتوێی چەندین دۆسیە و پرسی سیاسی و نیشتمانی کرا، کە لە سەروی هەمویانەوە تەواوکردنی پێکهێنانی کابینەی وەزاری بو.
ئه‌وه‌ش خراوه‌ته‌ڕو، له كۆبونه‌وه‌كه‌دا تاوتوێی پشتیوانیکردنی ڕێکارەکانی حکومەت كرا لە بوارەکانی ڕوبەڕوبونەوەی گەندەڵی، بەهێزکردنی دەستپاکی، چاکسازیی ئابوری، کۆنترۆڵکردنی چەک لە دەستی دەوڵەت و سەپاندنی سەروەریی یاسا؛ بەشێوازێک کە ببێته مایه‌ی چەسپاندنی ئاسایش و سەقامگیری و پاراستنی دامەزراوەکانی دەوڵەت.
به‌گوێره‌ی راگه‌یه‌ندراوه‌كه، لە کۆبونەوەکەدا باس له دۆسیەی پەیوەندییەكانی ده‌ره‌وه کراو جەخت لەسەر گرنگیی بەردەوامیی كرانه‌وه‌ی عێراق بەڕوی دەوروبەرە هەرێمی و نێودەوڵەتییەکەیدا کرایەوە، لەگەڵ بەهێزکردنی هاوبەشییە ئابورییه‌كان و هاوبه‌شی وەبەرهێنان بۆ ڕوبەڕوبونەوەی ئاڵنگارییەكانی ئێستای ناوچەکە، بە شێوەیەک کە ڕەنگدانەوەی ئەرێنی لەسەر ئابوریی عێراق هەبێت.