دانیشتووان و جووتیارانی کوردی و تورکمانی گوندی تۆپزاوە لە سنووری پارێزگای کەرکووک، لە تەنیشت مۆنۆمێنتی ئەنفال گردبوونەوەیەکی ناڕەزایەتییان رێکخست. ناڕەزایەتییەکە لە دژی بڕیارێکی ئیدارەی کەرکووکە کە تایبەتە بە جێبەجێکردنی ماستەرپلانی نوێی شارەکە لەسەر زەوییە کشتوکاڵییەکانی ئەو سنوورە.

ئاوێنە: بەپێی راگەیەندراوی بەشداربووانی گردبوونەوەکە، ناڕەزایەتییەکە لەسەر ئەوەیە کە ماستەرپلانە نوێیەکە کەرتی 24ـی تۆپزاوە دەگرێتەوە، کە بە گوتەی ئەوان درێژەپێدەری بڕیارەکانی ساڵی 1975ـی رژێمی پێشووە سەبارەت بە دەستبەسەرداگرتنی زەوییە کشتوکاڵییەکان، هاوکات هۆشداری دەدەن لەوەی ئەم هەنگاوە دەبێتە هۆی گۆڕینی دیمۆگرافیای ناوچەکە و دابەشکردنی زەوییەکان بەسەر کەسانی دەرەوەی گوندەکەدا.

لە لێدوانێکدا بۆ میدیاکان، جووتیارێکی ناوچەکە ئاماژەی بەوە کرد ئیدارەی پارێزگاکە لەژێر ناوی فراوانکردنی شار، لە هەوڵی دابەشکردنی 50 هەزار پارچە زەویدایە لەسەر ئەو روبەرەی ماوەی 51 ساڵە کێشەی خاوەندارێتی لەسەرە. هەروەها ناوبراو جەختی لەوە کردەوە کە ئەم رێکارە پێچەوانەی ماددەی 140ـی دەستووری عێراق و ئەو یاسایانەیە کە لە پەرلەمان بۆ چەسپاندنی مافی جووتیاران پەسەند کراون.

بەشداربووانی گردبوونەوەکە لە بەیاننامەی کۆتاییدا پێنج داواکاریی سەرەکییان خستەڕوو:

- هەڵوێستی ئەنجوومەنی پارێزگا: ئەندامانی کوردی ئەنجوومەنی پارێزگای کەرکووک بە فەرمی دژی ئەو بەشەی ماستەرپلانەکە بوەستنەوە کە گوندی تۆپزاوە دەگرێتەوە.

- بەدواداچوونی پەرلەمانی: نوێنەرانی کورد و تورکمان لە پەرلەمانی عێراق بەدواداچوون بۆ جێبەجێکردنی یاسای ژمارە 3ـی ساڵی 2025 بکەن، کە پەیوەستە بە هەڵوەشاندنەوەی بڕیارەکانی رژێمی پێشوو و گەڕاندنەوەی زەوییەکان بۆ خاوەنەکانیان.

- راگرتنی پڕۆژەکان: راگرتنی تەواوی کارەکانی پەیوەست بە ماستەرپلان لەو ناوچەیە تا کاتی جێبەجێکردنی یاسای ناوبراو.

- دەرکردنی رێنمایی لەلایەن بەغداوە: داوا لە حکوومەتی فیدراڵی کرا بە پەلە رێنمایییەکانی تایبەت بە جێبەجێکردنی یاسای گەڕاندنەوەی زەوییەکان دەربکات.

- رێگری لە بەکارهێنانی سوپا: داوا لە ئەنجوومەنی پارێزگا دەکرێت رێگری بکات لە بەکارهێنانی هێزەکانی سوپای عێراق لە کێشە و مامەڵەکردن لەگەڵ زەوییە کشتوکاڵییەکاندا.

لە کۆتایی گردبوونەوەکەدا، ئامادەبووان جەختیان لەسەر پاراستنی ناسنامەی ناوچەکەیان کردەوە و رایانگەیاند لەسەر مافە یاسایی و مێژووییەکانیان لەسەر خاکی گوندەکەیان بەردەوام دەبن.