سەرۆکی بەشی کەشناسیی عێراق رایگەیاند، لە سەرەتای مانگی ئەیلوولەوە گۆڕانکاریی گەورە لە کەشوهەوای عێراق روودەدات و کەشی پایزە دەست پێدەکات.
ئاوێنە: ئەمڕۆ سێشەممە مەحموود عەبدوللـەتیف، سەرۆکی بەشی کەشناسی لە دەستەی کەشناسی و بوومەلەرزەزانیی عێراق بە میدیا کوردییەکانی وتووە "عێراق لەبەردەم دوو سیستمی کەشوهەوای جیاوازدایە، ناوچەکانی ناوەڕاست و باشوور زۆر گەرمن، بەڵام ناوچەکانی هەرێمی کوردستان پلەی گەرمایان نزمترە".
وتوشیەتی "رۆژی چوارشەممە پلەی گەرما لە هەولێر 39 پلە دەبێت، لە کاتێکدا لە مووسڵ 41 پلەیە، بەڵام لە باشوور پلەی گەرما زۆر بەرزە و لە هەندێک شوێن لە 50 پلە نزیک دەبێتەوە."
دەرباری کەشی رۆژی پێنجشەممەش، ئەو کەشناسە دەڵێت "بۆ رۆژی پێنجشەممە، پلەی گەرما لە ناوەڕاست و هەرێمی کوردستان کەمێک بەرز دەبێتەوە، بەهۆی چالاکبوونی با ئەگەری تۆز و خۆڵێکی سووک لە ناوەڕاست و باشوور هەیە".
بە وتەی مەحموود عەبدوللـەتیف، "رۆژانی هەینی و شەممە پلەی گەرما لە زۆربەی ناوچەکان بەرز دەبێتەوە، بەڵام لە هەرێمی کوردستان جێگیر دەبێت".
"ئەم هەفتەیە هیچ دابەزینێکی ئەوتۆ لە پلەی گەرما روونادات، بەڵام پێویستە هاوڵاتییان چاوەڕێی 1ی ئەیلوول بکەن، هەست بە گۆڕانکارییەکی راستەقینە دەکەین و گۆڕانکاریی گەورە لە پلەکانی گەرمادا روودەدات و بەرەو کەشوهەوای پاییزی هەنگاو دەنێین". سەرۆکی بەشی کەشناسی لە دەستەی کەشناسی و بوومەلەرزەزانیی عێراق وای وت