دەستەی دەستپاکی عێراق رایگەیاند، لە پارێزگای سەلاحەددین دەستەکەیان توانیویانە بەرپرسی بەشی موڵکایەتی لەبەڕێوەبەرایەتیی شارەوانیی تکریت و فەرمانبەرێکی هەمان بەش دەستگیر بکەن و دەستبەسەر ٩٤ بەڵگەنامە و سامانێکی زۆر بگرن.
ئاوێنە: دەستەی دەستپاکی لەمیانی راگەیەندراوێکدا ئاشکرایکردووە "تۆمەتبارەکە بە هاوکاریی ژمارەیەک فەرمانبەر و راسپێردراو، وەسڵی مامەڵەی تەرخانکردنی زەویی هاوڵاتییانیان بە نرخێکی زۆر کەم کڕیوەتەوە و دواتر خستوویاننەتە نێو لیستی رەسمیی وەجبەکانی دابەشکردنی زەوی، تا ببنە خاوەنیان و بییانفڕۆشنەوە و قازانجەکەی لەنێوان خۆیاندا دابەش بکەن".
ئەوەش هاتووە "دوای وەرگرتنی بڕیاری دادوەر و دەستگیرکردنی بەرپرسەکە، لەکاتی پشکنینی ماڵەکەیدا دەست بەسەر ٩٤ بەڵگەنامەی زەویی سەر بە شارەوانی، کۆمەڵێک وەسڵی وەرگرتنی مامەڵەی هاوڵاتییان، بڕێک پارەی عێراقی و دۆلار، ئۆتۆمبێلێکی نوێ، چەکی سووک و کۆمەڵێک زێڕدا گیراوە".
لە هەمانکاتدا، فەرمانبەرێکی دیکەی هەمان بەش دەستگیرکرا کە لە ماڵەکەیدا کۆمەڵێک بەڵگەنامەی رەسمیی شارەوانی، لەوانە مامەڵەی تەرخانکردنی زەوی و گواستنەوەی موڵکایەتی شاردرابوونەوە.
لە کۆتای راگەیەندراوەکەشدا دەستەی دەستپاکی عێراق رایگەیاندووە "لە ئێستادا بە بڕیاری دادوەری دادگای لێکۆڵینەوەی دەستپاکی، هەردوو تۆمەتبار بەپێی ماددەکانی (٢٨٩/ ٢٩٨) لە یاسای سزادان راگەیەندراون و لێکۆڵینەوە لەگەڵیاندا بەردەوامە".