بەهۆی پەرەسەندنی بەریەککەوتنە دەریاییەکان لە ناوچەی کەنداو، ڕۆژی پێنجشەممە نرخی نەوت لە بازاڕەکانی جیهاندا ڕووی لە بەرزبوونەوەی زیاتر کرد و نرخی بەرمیلێک خاوی برێنت پێگەی خۆی لە سەرووی ١٠٠ دۆلاردا پاراست. ئەم بازدانەی نرخ دوای ئەوە هات کە ئێران ڕایگەیاند وەک وەڵامێک بۆ لێدانی کەشتییە نەوتییەکانی لەلایەن ویلایەتە یەکگرتووەکانی ئەمریکاوە، چەند کەشتییەکی کردووەتە ئامانج کە هەوڵی تێپەڕبوونیان لە گەرووی هورمز دەدا.
ئاوێنە: لە گۆڕانکارییە بازرگانییەکانی بەیانیی پێنجشەممەدا لە بازاڕەکانی ئاسیادا، نرخی خاوی برێنتی دەریای باکوور بە ڕێژەی نزیکەی ٠.٥٪ زیادی کرد و گەیشتە سەرووی ١٠١.٦٠ دۆلار بۆ هەر بەرمیلێک؛ ئەمەش دوای ئەوەی ڕۆژی چوارشەممە بۆ یەکەمین جار لە مانگی تەمووزی ڕابردووەوە بەربەستی ١٠٠ دۆلاری شکاندبوو.
لەلایەکی دیکەوە، ئەم دۆخە ئابوورییە ئاڵۆزە ڕەنگدانەوەی بەهێزی لەسەر کایەی سیاسیی ئەمریکا دروست کردووە. دۆناڵد ترەمپ، سەرۆکی ئەمریکا، لە میانەی کۆنگرەیەکی نائاسایی پارتی کۆمارییەکان لە شاری دالاسی سەر بە ویلایەتی تەکساس، هەوڵیدا پشتگیریی لایەنگرانی کۆبکاتەوە و لە وتارێکدا ڕایگەیاند: «ڕاستەوخۆ دوای هەڵبژاردنەکان، نرخەکانی نەوت دادەبەزن».
چاودێرانی سیاسی و ئابووری پێشبینی دەکەن کە گرانبوونی توندی سووتەمەنی و کەمبوونەوەی دەسەڵاتی کڕینی هاووڵاتییان لە ئەمریکا و سەرانسەری جیهاندا، ببێتە فاکتەرێکی یەکلاکەرەوە لە هەڵبژاردنەکانی نیوەی خولی ئەمریکادا کە بڕیارە لە تشرینی دووەم بەڕێوەبچێت.
ئەم شەپۆلە نوێیەی هەڵکشانی نرخەکان هاوکاتە لەگەڵ چەقبەستنی دانوستانەکان بۆ ڕاگرتنی شەڕ و کۆتاییهێنان بەو ململانێ سەربازییەی کە بە هێرشە هاوبەشەکانی ئەمریکا و ئیسرائیل بۆ سەر ئێران لە ٢٠ی شوباتی ڕابردوودا دەستی پێکرد.