لە مامەڵەکانی دوانیوەڕۆی ئەمڕۆدا، ئاراستەی نرخی نەوت لە بازاڕەکانی جیهاندا پێچەوانە بووەوە، ئەمەش دوای ئەوەی بەرپرسێکی باڵای ئێران ڕایگەیاند، ئەگەر ویلایەتە یەکگرتووەکانی ئەمریکا فشارە سەربازییەکانی کەم بکاتەوە، تاران دەتوانێت لە ماوەی حەوت ڕۆژدا گەرووی هورمز بەڕووی هاتوچۆی دەریاییدا بکاتەوە.

ئاوێنە: تا کاتژمێر 13:12 بە کاتی مۆسکۆ، گرێبەستە ئایندەییەکانی نەوتی خاوی "برێنت" بۆ مانگی تشرینی دووەمی داهاتوو بە ڕێژەی 2.66% دابەزی و گەیشتە 97.67 دۆلار بۆ هەر بەرمیلێک. بەمەش بۆ یەکەمجار لە دوای 8ی ئەیلوولی ئەمساڵەوە، نرخەکەی بۆ خوار 98 دۆلار پاشەکشەی کرد.

هاوکات، گرێبەستە ئایندەییەکانی نەوتی خاوی "تەکساسی ئەمریکی" بۆ مانگی تشرینی دووەم بە ڕێژەی 3.18% دابەزی و گەیشتە 89.43 دۆلار بۆ هەر بەرمیلێک، ئەمەش لە کاتێکدایە کە لە سەرەتای مامەڵەکانی بەیانیدا نرخی زێڕی ڕەش بەرزبوونەوەی بەخۆوە بینیبوو.

لە لێدوانێکدا بۆ ئاژانسی ڕۆیتەرز، ئەو بەرپرسە باڵایەی ئێران ئاماژەی بەوە کرد کە پێویستە ئەمریکا بە فەرمی ویستی خۆی بۆ چارەسەرکردنی کێشەکان لە ڕێگەی دیپلۆماسییەوە ڕابگەیەنێت، پاشانیش لەسەر خشتەیەکی کاتی بۆ بەرەوپێشچوونی پرۆسەکە ڕێکبکەون. جەختیشی لەوە کردەوە کە شاندی ئێرانیی بەشدار لە کۆبوونەوەکانی کۆمەڵەی گشتیی نەتەوە یەکگرتووەکان لە نیویۆرک، دەسەڵاتی تەواویان پێدراوە بۆ کاراکردنەوەی ڕێڕەوی دیپلۆماسی لەگەڵ واشنتۆن.

بەرپرسەکە ئەوەشی ڕوون کردەوە کە مەسعود پزیشکیان، سەرۆک کۆماری ئێران کە بەیانیی ئەمڕۆ سێشەممە تارانی بەرەو نیویۆرک جێهێشتووە، لە پەراوێزی کۆبوونەوەکانی نەتەوە یەکگرتووەکاندا هیچ دیدارێک لەگەڵ دۆناڵد ترەمپ، سەرۆکی ئەمریکا ئەنجام نادات.

سەبارەت بە هەوڵەکانی دیکە، بەرپرسەکەی ئێران باسی لە ئەگەری تاوتوێکردنی وردەکارییەکانی ڕێککەوتنێک کرد بۆ کۆتاییهێنان بە کردەوە سەربازییەکان لەگەڵ واشنتۆن، کە بڕیارە لە ڕێگەی نێوەندگیرەکانەوە لە نیویۆرک ئەنجام بدرێت. ئاشکراشی کرد کە لە 16ی ئەیلوولی 2026دا، تاران لە ڕێگەی نێوەندگیرەکانەوە پێشنیازی خۆی لەم بارەیەوە ڕادەستی لایەنی ئەمریکی کردووە.

بە وتەی هەمان سەرچاوە، کۆبوونەوەکانی کۆمەڵەی گشتیی نەتەوە یەکگرتووەکان وەک "هەلێکی زێڕین" وان بۆ ئەوەی ئەمریکا بگەڕێتەوە بۆ سەر مێزی گفتوگۆ، وتیشی کە تاران پێشوازی لە کاراکردنەوەی پەیوەندییە دیپلۆماسییەکان دەکات ئەگەر واشنتۆن هەنگاوی کرداری و بەرجەستە بنێت.

ئەم پێشهاتانە دوای ئەوە دێن کە یەکشەممەی ڕابردوو ئەمریکا و ئێران هەڕەشەیان لە یەکتر کرد، بەڵام دواتر دۆناڵد ترەمپ، سەرۆکی ئەمریکا ڕایگەیاند کە کراوەیە بۆ کۆبوونەوە لەگەڵ مەسعود پزیشکیان، سەرۆک کۆماری ئێران کە پێشبینی دەکرێت بۆ بەشداریکردن لە کۆبوونەوەکانی نەتەوە یەکگرتووەکان ئەم هەفتەیە لە نیویۆرک بێت.