رۆژی چوارشەممە، فۆئاد حوسێن، وەزیری دەرەوەی عێراق، لە چوارچێوەی کۆبوونەوەکانی لە شاری نیویۆرک، لەگەڵ عەباس عێراقچی، وەزیری دەرەوەی کۆماری ئیسلامیی ئێران کۆبووەوە. تەوەری سەرەکیی گفتوگۆکانی نێوانیان تایبەت بوو بە هەوڵەکانی کردنەوەی گەرووی هورمز و کەمکردنەوەی گرژییەکانی ناوچەکە.
ئاوێنە: لە پەیامێکدا کە لە هەژماری فەرمیی خۆی لە تۆڕی کۆمەڵایەتیی (ئێکس) بڵاویکردووەتەوە، وەزیری دەرەوەی عێراق ئاماژەی بەوە کردووە کە لە دیدارەکەیدا لەگەڵ هاوتا ئێرانییەکەی، پەیوەندییە دووقۆڵییەکان و دوایین پێشهاتەکانی ناوچەکەیان تاوتوێ کردووە. هەروەها بەوردی باسیان لە پەیوەندییە ناڕاستەوخۆکانی نێوان تاران و واشنتۆن کردووە، هاوشانی ئەو هەوڵانەی دەدرێن بۆ هێورکردنەوەی دۆخەکە و دووبارە کردنەوەی گەرووی هورمز بەڕووی هاتوچۆی کەشتییەکان و کاروانی دەریاییدا.
لە بەشێکی دیکەی پەیامەکەیدا، فۆئاد حوسێن جەختی لەوە کردووەتەوە کە "گفتوگۆ و دیپلۆماسیەت وەک کاریگەرترین رێگە دەمێننەوە بۆ کۆنترۆڵکردنی گرژییەکان و رێگریکردن لە تەشەنەسەندنیان". هەروەها روونیکردووەتەوە کە پاراستنی ئاسایشی ناوچەکە و دەستەبەرکردنی ئازادیی کەشتیوانی، پێویستی بە هاوکاریی ناوچەیی و گفتوگۆیەکی بەرپرسیارانە هەیە لە نێوان سەرجەم لایەنە پەیوەندیدارەکاندا.
سەبارەت بە تەوەرەکانی دیکەی کۆبوونەوەکە، وەزیری دەرەوەی عێراق ئاشکرای کردووە کە پرسی بەرەنگاربوونەوەی تیرۆری سنووربەزێن و بەهێزکردنی هاریکارییە ئابوورییەکانی نێوان هەردوو وڵاتیش خراونەتە روو. لە کۆتاییدا، هەردوولا رێککەوتوون لەسەر بەردەوامبوونی راوێژ و هەماهەنگییەکانی نێوانیان بە ئامانجی پاڵپشتیکردنی ئاسایش و سەقامگیری لە تەواوی ناوچەکەدا.