بەڕێوەبەرایەتی فڕۆکەخانەی نێودەوڵەتیی نەجەف له به‌ره‌به‌یانی ئه‌مڕۆ هه‌ینییه‌وه ته‌واوی گه‌شته‌كانی له‌گه‌ڵ ئێران تا كاتێكی نادیار راگرت.
ئاوێنه: بەڕێوەبەرایەتی فڕۆکەخانەی نێودەوڵەتیی نەجەف بڕیاریدا بە راگرتنی سەرجەم گەشتە ئاسمانییەکانی نێوان عێراق و ئێران، لە کاتژمێر دوی بەرەبەیانی ئەمڕۆ هەینی ٢٥ی ئەیلول ٢٠٢٦ەوە تا كاتێكی نادیار، لەسەر رێنماییە فەرمییەکانی لایەنە تایبەتمەندەکان.
بەڕێوەبەرایەتییەکە، لە گشتاندنێکدا داوای کردوە ئاگاداری کۆمپانیاکانی فڕۆکەوانی و کارپێکەرە پەیوەندیدارەکان بکرێتەوە بەوەی هیچ رێکارێک سەبارەت بەو گەشتانەی بڕیاری راگرتنەکە دەیانگرێتەوە نەگرنەبەر، ئاماژەی بەوەش کردوە، دواتر ئاگاداریان دەکاتەوە لە هەر رێنماییەکی تر سەبارەت بە دەستپێکردنەوەی گەشتەکان.
بڕیاری راگرتنی گەشتەكانی فڕۆكەخانەی نەجەف لەكاتێكدایە، پێشتر موسەننا تاڵقانی، جێگری بەڕێوەبەری راگەیاندن و پەیوەندییە گشتییەکان لە فڕۆكەخانەكەی نێودەوڵەتیی نەجەف لە لێدوانێکی رۆژنامەوانیدا رایگەیاندبو، فڕۆكەخانەكە بەردەوامە لە ئاسانکاریی گەشتە ئاسمانییەکان بەپێی خشتە راگەیەندراوەکان و هیچ رێگرییەک نییە، جەختیشی کردەوە کە پابەند دەبن بە هەر رێنماییەکی حکومی بۆ ڕاگرتن بەپێی ئاگادارکردنەوەی فەرمی.
هاوكات کۆمپانیای نیشتمانی "ئێران ئێروەی" (Iran Air) رایگەیاندبوو، بەردەوامە لە گەشتەکانی لە تاران، مەشهەد و ئه‌سفه‌هان بۆ نەجەف بەپێی خشتەی دیاریکراو و هیچ ئاگادارکردنەوەیەکی لە دەسەڵاتدارانی عێراقەوە پێنه‌گەیشتوە.