وتەبێژی حکومەتی عێراق رایگەیاند، زەیدی لەگەڵ ئەمریكا رێككەوتووە لەسەر بەردەوامی ناردنی دۆلاری كاش بۆ عێراق و لە رۆژانی داهاتوودا بارێكی دۆلار دەگات.
ئاوێنە: حەیدەر عەبودی، وتەبێژی حکومەتی عێراق بە ئاژانسی هەواڵی عێراقی (واع)ی راگەیاند "عەلی فالح زەیدی، سەرۆکی ئەنجومەنی وەزیران گەیشتووەتە لێکتێگەیشتن لەگەڵ ویلایەتە یەکگرتووەکانی ئەمریکا بۆ بەردەوامبوونی ناردنی باری دۆلاری كاش و لە رۆژانی داهاتوودا بارێکی نوێی دۆلاری كاش دەگاتە عێراق".
عەبودی ئاشکراشیکرد "لە ئەنجامەکانی سەردانی عەلی زەیدی، سەرۆکی ئەنجومەنی وەزیران بۆ ویلایەتە یەکگرتووەکانی ئەمریکا، گەیشتن بوو بە لێکتێگەیشتن سەبارەت بە بەردەوامبوونی ناردنی باری دۆلاری كاش بۆ عێراق، بە شێوەیەک کە یارمەتیدەر بێت لە دابینکردنی پێداویستییە رەواکان بە دراوی بیانی و لە ڕۆژانی داهاتوودا بارێکی نوێ دەگات".
وتەبێژەکەی حکومەتی عێراق هێمای بۆ ئەوەشکرد کە ئەو لێکتێگەیشتنە لە روانگەی ئەو پێشکەوتنەوە دەێت کە عێراق بەدەستی هێناوە لە بەهێزکردنی سیستەمی چاودێری بەسەر دابەشکردنی دۆلارو رێکخستنی بەکارهێنانەکانی و ڕاگرتنی حاڵەتەکانی خراپ بەکارهێنانی دراوی بیانی، لەگەڵ فراوانکردنی هۆکارەکانی پێدانی ئەلیکترۆنی و بەردەوامبوون لە گوێزرانەوەی پلەبەپلە بەرەو ئابوریی دیجیتاڵی.