ئەمڕۆ چوارشەممە (30ـی ئەیلوولی 2026)، قاسم ئەعرەجی، راوێژکاری سەرۆکوەزیرانی عێراق، گۆڕانکارییەکی ستراتیژیی لە پەیوەندییە سەربازییەکانی نێوان بەغدا و هاوپەیمانیی نێودەوڵەتی دژ بە داعش بە رابەرایەتیی ویلایەتە یەکگرتووەکانی ئەمریکا راگەیاند. ئەعرەجی لە رێگەی هەژماری فەرمیی خۆی لە تۆڕی کۆمەڵایەتیی (ئێکس) بڵاویکردەوە کە کۆتاییهاتنی ئەرکی هاوپەیمانان لە عێراق بە واتای پچڕانی پەیوەندییەکان نایەت، بەڵکو گۆڕینی شێوازی کارکردنە بۆ هاوکاریی ئەمنی و هەواڵگریی دووقۆڵی.
ئاوێنە: لە پەیامەکەیدا، راوێژکاری سەرۆکوەزیرانی عێراق ئەم گۆڕانکارییەی وەک "وێستگەیەکی گرنگ" ناوبرد و ئاماژەی بەوە کرد کە کۆتاییهێنان بە بوونی هێزەکانی هاوپەیمانان و ئەرکەکانیان، هەنگاوێکە بۆ گواستنەوەی پەیوەندییەکان لە چوارچێوەی هاوپەیمانییەکی فرەجەمسەرەوە بۆ پەیوەندیی راستەوخۆی دووقۆڵی لەگەڵ وڵاتانی بەشدار. ناوبراو پێی وایە ئەم هەنگاوە دەبێتە هۆی چەسپاندنی زیاتری سەروەریی خاکی عێراق و خزمەتکردن بە بەرژەوەندییە باڵاکانی نیشتمان و داواکارییەکانی هاووڵاتییان.
سەبارەت بە قۆناغی رووبەڕووبوونەوەی چەکدارانی رێکخراوی داعش، ئەعرەجی باسی لەوە کرد کە ئەو سەرکەوتنانەی بەدەستهاتوون، لە دەرەنجامی قوربانیدانی گەلی عێراق و رۆڵی هێزە چەکدارەکان بووە بە سەرجەم پێکهاتەکانیانەوە. هاوکات، بە فەرمی پێزانینی وڵاتەکەی بۆ رۆڵی هاوپەیمانیی نێودەوڵەتی و وڵاتانی هاوپەیمان دەربڕی کە پشتیوانییەکی بەرچاویان لەو سەرکەوتنانەدا هەبووە.
لە کۆتایی لێدوانەکانیدا، قاسم ئەعرەجی جەختی لە شێوازی مامەڵەی داهاتووی عێراق کردەوە لەگەڵ وڵاتانی هاوپەیمان و روونیکردەوە کە قۆناغی داهاتوو لەسەر بنەمای بەرژەوەندیی هاوبەش و رێزگرتنی یەکتر بونیاد دەنرێت. ئەم پەیوەندییە نوێیە پێکهاتووە لە بەردەوامبوونی هاوکارییە ئەمنی و هەواڵگرییەکان، ئاڵوگۆڕکردنی زانیاری، سوودوەرگرتن لە ئەزموونی یەکتر و بەرزکردنەوەی توانای هێزە عێراقییەکان، ئەوەش بە مەبەستی پاراستنی سەقامگیری، بەهێزکردنی ئاسایشی ناوخۆیی و رەخساندنی زەمینەیەکی گونجاو بۆ ئاشتی و خۆشگوزەرانیی بەردەوام لە وڵاتدا.