عهلی زهیدی، سهرۆك وهزیران و فهرماندهی گشتی هێزه چهكدارهكانی عێراق رایدهگهیهنێت، ئهمڕۆ بڕیاره ئهمنی و سەربازییهكان بەتەواوهتی لهدهستی دامهزراوه فهرمییهكانی دهوڵهتدان و جهختیش له گرنگیی ڕۆڵی دەستەی پیشەسازیی سەربازی لەم قۆناغەدا دهكاتهوه بۆ دروستکردنی هاوبەشییەکی بەرهەمدار لەگەڵ کۆمپانیا جیهانییە پسپۆڕەکان لە دروستکردنی چەک و كهرهستهی سەربازیدا.
ئاوێنه: بهپێی راگهیهندراوێكی نوسینگهكهی، ئەمڕۆ چوارشەممە، عهلی زهیدی، سەرۆک وەزیران و فەرماندەی گشتیی هێزە چەکدارەکانی عێراق، سەرۆکایەتی کۆبونەوەی نائاسایی ئەنجومەنی وەزاریی ئاسایشی نیشتمانی کرد، بە مەبەستی تاوتوێکردنی توندوتۆڵی و ئەرکە سەربازی و ئهمنییهكانی هێزە چهكدارهكان لە قۆناغی دوای تەواوبونی کشانەوەی هاوپەیمانی نێودەوڵەتی و تهواوكردنی سەروەریی نیشتمانی.
بهپێی راگهیهندراوهكه، لە کۆبونەوەکەدا ئهو رێكخستن و پلانانە تاوتوێ کران کە بەرپرسن لە بەهێزکردنی توانای دامەزراوە سەربازییەکان بۆ چەسپاندنی ئاسایش و سەقامگیری و بەهێزکردنی دهسهڵاتی یاسا و دەوڵەت.
زهیدی لە وتەیەکدا لە کاتی کۆبونەوەکەدا جەختی کردەوە کە ئهمڕۆ بڕیاره ئهمنی و سەربازییهكان بەتەواوهتی بونەتە بڕیاری نیشتمانی و تایبەت بە دامەزراوە فەرمییەکانی دەوڵەت و ئاماژەی بە پێویستی هۆشیاری و ئامادەیی بەردەوام، بەرزکردنەوەی ئاستی هەماهەنگی و هاریكاری نێوان تەواوی هێز و دەزگا ئهمنییهكان، نۆژەنکردنەوەی پلان و ڕێکار و داتاكان و پشتبەستن بە هۆکارە تەکنەلۆژییە هاوچەرخەکان کرد بۆ پاراستنی ئاسایش و سەقامگیری لە سەرانسەری ناوچەکانی وڵاتدا.
هەروەها فەرماندەی گشتیی هێزە چەکدارەکان جەختی لەسەر گرنگیی بەهێزکردنی هەوڵە هەواڵگرییەکان، پشتگیری لە کارە ئهمنییه پێشوەختەکان و لێپێچینهوه له سەرچاوەکانی گوتاری توندڕەوی و خۆشکردنی ئاگری تایفەگەری کردەوە کە یەکێتیی پێکهاتەکانی گەلی عێراق دەکاتە ئامانج و دوبەرەکی بڵاودەکاتەوە و هەڕەشە لە ئاشتیی ناوخۆیی و کۆمەڵایەتی دەکات.
زهیدی جهختیشی له گرنگیی ڕۆڵی دەستەی پیشەسازیی سەربازی لەم قۆناغەدا کردهوه ئهوهش لە ڕێگەی دروستکردنی هاوبەشییەکی بەرهەمداری بەرهەمهێنان لەگەڵ کۆمپانیا جیهانییە پسپۆڕەکان لە دروستکردنی چەک و كهرهستهی سەربازی و ڕونیشیکردەوە کە حکومەت بەردەوامە لە بەدیهێنانی هاوبەشییه هەرێمایهتی و نێودەوڵەتییهكان بۆ هاریکاریی هاوبەش، بەدور لە سیاسەتی بەرهگیری و لەسەر بنەمای ئاڵوگۆڕی بەرژەوەندیی هاوبەش.