ڕۆژی پێنجشەممە، 1ـی تشرینی یەکەمی 2026، باڵیۆزخانەی کۆماری ئیسلامیی ئێران لە بەغدا پەیامێک و داواکارییەکی بەپەلەی گەیاندە حکوومەتی عێراق بۆ ڕێگریکردن لە هەر جۆرە سنووردارکردنێکی گەشتە ئاسمانییەکانی نێوان هەردوو وڵات. باڵیۆزخانەکە هۆشداریی داوە کە جێبەجێکردنی ئەو جۆرە ڕێوشوێنانە دەبێتە هۆی دروستبوونی ئاستەنگ و قورسایی بۆ سەرنشینان، بەتایبەتی بۆ قوتابیان و ئەو نەخۆشانەی بە مەبەستی وەرگرتنی چارەسەر گەشت دەکەن.
ئاوێنە: لە ڕاگەیەندراوێکدا کە لەسەر هەژماری فەرمیی خۆی لە پلاتفۆرمی ئێکس بڵاویکردووەتەوە، باڵیۆزخانەی ئێران ئاماژەی بەوە کردووە کە پەیوەندییەکانی تاران و بەغدا لەسەر بنەمایەکی مێژوویی قووڵ و بەرژەوەندیی هاوبەش بونیاد نراون. هەروەها جەختی لەوە کردووەتەوە کە پێویستە حکوومەتی عێراق، وەک دەوڵەتێکی سەربەخۆ، هەنگاوی پێویست بنێت بۆ پاراستنی ئەم پەیوەندییانە لەو لێکەوتە و ورووژاندنانەی کە بەهۆی سزاکانی ئەمریکاوە دروست دەبن.
ئەم پەرەسەندنە دوای ئەوە دێت کە وەزارەتی گەنجینەی ئەمریکا، لە ڕێگەی نووسینگەی کۆنترۆڵکردنی سامانە بیانییەکان (OFAC)، لە ڕێکەوتی 29ـی ئەیلوولدا بڕیارێکی دەرکرد. بەپێی بڕیارەکە، مۆڵەتێکی تایبەت بە هێڵی ئاسمانیی عێراقی دراوە بۆ ڕاپەڕاندنی مامەڵە پێویستەکان و ئەنجامدانی گەشتی گواستنەوەی سەرنشینان لە نێوان عێراق و ئێران، بە دیاریکراوی لە ڕێگەی فڕۆکەخانەی نەجەفەوە. بەڵام ئەم مۆڵەتە بە مەرج و کۆتوبەندی دیاریکراو بەستراوەتەوە.
لە لایەکی دیکەوە، سەرچاوەکان پشتڕاستیان کردووەتەوە کە ئەو سزایانەی پێشتر خرابوونە سەر هێڵە ئاسمانییەکانی ئێران، بەبێ گۆڕانکاری و وەک خۆیان ماونەتەوە. هاوکات، وەزارەتی گەنجینەی ئەمریکا ڕێنمایی توندی داوەتە کۆمپانیا بیانییەکانی بواری خزمەتگوزاریی لۆجستی لە فڕۆکەخانەکانی سەرانسەری جیهاندا، کە بەهۆی سزاکانی سەر تارانەوە، هەر جۆرە مامەڵەیەکی دارایی بە دۆلاری ئەمریکی لەگەڵ لایەنە ئێرانییەکاندا بە تەواوی قەدەغەیە.