مەزھەر محەمەد ساڵح، ڕاوێژکاری دارایی سەرۆک وەزیرانی عێراق، جه‌خت ده‌كاته‌وه كه ڕێکارەكانی حكومه‌ت بۆ چاودێری، کۆڵەکەیەکی سەرەکین بۆ کۆنترۆڵکردنی بازاڕەکان، ڕاگرتنی بەرزبونەوەی بێ پاساوی نرخەکان، بەرەنگاربونەوەی قۆرخکاری و یاریكردن به نرخ و ڕێگریکردن لە قۆستنەوەی پێویستی هاوڵاتیان له خۆراک و شتومه‌ك.
ئاوێنه: مەزھەر محەمەد ساڵح، ڕاوێژکاری دارایی سەرۆک وەزیرانی عێراق، ئه‌مڕۆ شه‌ممه، به میدیای ره‌سمی وڵاته‌كه‌ی وت "تەواوکاریی لە کاری دەزگا بازرگانی و چاودێرییەکاندا بەشدار دەبێت لە بەدواداچونی بازاڕەکان، تۆمارکردنی سەرپێچییەکان و جێبەجێکردنی ڕێکارە یاساییه‌كان بەرامبەر سەرپێچیکاران، بە شێوازێک کە کێبڕکێی دادپەروەرانە بەهێزتر دەکات و توانای کڕینی هاوڵاتییان، بەتایبەت كه‌مده‌رامه‌ته‌كان دەپارێزێت."
جه‌ختیشی كرده‌وه كه حكومه‌ت رێكاری گرنگی گرتونه‌ته به‌ر بۆ كۆنترۆڵكردنی بازاڕه‌كان و رێگریی له به‌رزبونه‌وه‌ی نرخی شتومه‌ك و كاڵاكان.
مه‌زهه‌ر محه‌مه‌د ساڵح ئاماژەی بە "گرنگیی هەماهەنگی لە نێوان لایەنە پەیوەندیدارەکاندا کرد بۆ دەستەبەرکردنی ئاسانکاری و ڕەوانڕەویی هاتنی کەلوپەل بۆ بازاڕەکان، هاوتەریب لەگەڵ ڕێکارەکانی حکومەت کە ئامانجیان ئاسانکارییە بۆ جوڵەی بازرگانی و چارەسەرکردنی ئەو کۆسپانەی ڕوبەڕوی پرۆسەکانی دابینکردن و دابەشکردن دەبنەوە، ئەمەش كارایی بازاڕ بەهێز دەکات و بەشدار دەبێت لە سەقامگیریی نرخەکان و بەردەستبونی کەرەستە سەرەکییەکان."
ئه‌وه‌شی خستەڕو کە "چاودێریی کاریگەر ئامانجی لێدان لە چالاکیی بازرگانیی ڕەوا نییە، بەڵکو هەوڵدەدات بۆ ڕێگریکردن لە ڕەفتارە قۆرخکارییەکان، یاریپێکردنی نرخ و قۆستنەوەی بارودۆخە ئابورییەکان بۆ دەستکەوتنی قازانجی بێ پاساو، لەگەڵ پاراستنی هاوسەنگی لەنێوان مافی بەکاربەران و بەرژەوەندیی بازرگانە پابەندەکاندا و چەسپاندنی ژینگەیەکی بازرگانیی دامەزراو لەسەر شەفافیەت و دادپەروەری."
وتیشی "پابەندبوون بە یاسا به‌ركاره‌كان کە مامەڵە دارایی و بازرگانییەکان ڕێکدەخەن گرنگییەکی زۆری هەیە و ئاڕاستەیەکی حکومی هەیە بۆ پشتبەستن بە دیناری عێراقی لە مامەڵەکانی ناوخۆی عێراقدا بەپێی بڕگە یاساییە پەیوەندیدارەکان، بەجۆرێک کە پشتگیری لە متمانە بە دراوی نیشتمانی دەکات و مامەڵەکانی ناو بازاڕ ڕێکدەخات."
جەختیشی کردەوە لەوەی "بەردەوامیی هەڵمەتەكانی چاودێری، بەهێزکردنی هەماهەنگیی دامەزراوەیی، پشتیوانیکردنی بەرهەمی ناوخۆیی، ئاسانکاریی بۆ باشی کەلوپەل و لێپرسینەوە لە سەرپێچیکاران، هۆکاری گرنگن بۆ پاراستنی بەکاربەر و بەهێزکردنی سەقامگیریی بازاڕ."
ئەوەشی ڕون کردەوە کە "سەقامگیریی نرخەکان تەنها بە چاودێری بەدەست نایەت، بەڵکو پێویستی بە تەواوکاریی چاودێرییە لەگەڵ سیاسەتە ئابوری و خۆراکییەکان و ڕێکارە ئاسانکارییەکان بۆ چالاکیی بازرگانی، بە شێوەیەک کە پشتیوانی لە سەقامگیریی بژێوی، ئابوری و کۆمەڵایەتی لە عێراقدا بکات."