وەزارەتی گواستنەوەو گەیاندنی هەرێمی كوردستان رایگەیاند، لەهەردو فڕۆكەخانەی نێودەوڵەتی هەولێرو سلێمانی ئامێری پشكنینی گەشتیاران دانراوە بۆ رێگریكردن لەهاتنەناوەوەی ڤایرۆسی كۆرۆنا.

ئاوێنە: وەزارەتەكە ئەمڕۆ دوشەممە لە راگەیەندراوێكدا كە وێنەیەكی دەست ئاوێنە كەوتوە رایگەیاند، به‌ڕێوه‌به‌رایه‌تی گشتی پۆسته‌ و گه‌یاندنی سه‌ر به‌ وه‌زاره‌تی گواستنه‌وه‌ و گه‌یاندن، بۆ پاراستنی گیانی كارمه‌ندان و هاوڵاتیانی هه‌رێمی كوردستان ده‌ستوبردی كردوه‌ له‌ گرتنه‌به‌ری رێوشوێنه‌كانی خۆپارێزی و سه‌لامه‌تی.

هێمای بۆ ئەوەش كردوە كە  بەڕێوەبەرایەتییەكە له‌ هه‌نگاوێكی به‌په‌له‌دا ده‌ستیكردوه‌ به‌ دابه‌شكردنی ده‌ستكێش و ماسك به‌سه‌ر كارمه‌ندانی پۆسته‌و پابه‌ندكردنیان به‌ به‌كارهێنانی له‌كاتی كاركردندا كە‌ پۆسته‌ی هه‌رێمی كوردستان له‌ رێگای سه‌نته‌ری نێوده‌وڵه‌تی ئاڵوگۆڕی پۆسته‌ له‌ هه‌ولێر، رۆژانه‌ ئاڵوگۆڕی پۆسته‌و پێچراو به‌ ناردن و هاتن له‌گه‌ڵ زۆربه‌ی وڵاتانی جیهان ده‌كات.

راگەیەندراوەكەی وەزارەتی گواستنەوە ئەوەشی خستۆتەڕو كە  له‌ هه‌ردو فڕۆكه‌خانه‌ی نێوده‌وڵه‌تی هه‌ولێر و سلێمانی كه‌ سه‌ر به‌ وه‌زاره‌تی گواستنه‌وه‌ و گه‌یاندنی حكومه‌تی هه‌رێمن ئامێری پشكنینی گه‌شتیاران دانراوه‌و له‌ فه‌رمانگه‌كانی پۆسته‌ و گواستنه‌وه‌ ده‌ستكراوه‌ به‌ پێدانی رێنمایی ته‌ندروستی و پێداویستییه‌كانی خۆپاراستن له‌ په‌تای ڤایرۆسی كۆرۆنا.

پێشتر وەزارەتی تەندروستی هەرێمی كوردستان لەباره‌ی ڤایرۆسی كۆرۆنا رایگه‌یاندبو، هەرێمى کوردستان وەک سەرجەم وڵاتانى دیکەى جیهان لە نزیکەوە چاودێرى بارودۆخى ئەم پەتایە دەکەن و رێکارى پێویست دەگرنەبەر و رێنمایی خۆپاراستنی بڵاوكردۆته‌وه‌.

وه‌زاره‌تی ته‌ندروستیی حکوومه‌تی هه‌رێمی کوردستان وتبوی: ڕێوشوێنى پێویست گیراوه‌ته‌به‌رو تا ئێستا مه‌ترسیی له‌سه‌ر هه‌رێمى کوردستان و عێراق نه‌بوه‌.

نەخۆشی ڤایرۆسی کۆرۆنا لە کۆتایی مانگی کانونی یەکەمی 2019 لە شاری وهان لە چین سەریهەڵداو دواتر له‌ چەند ولاتێکی دیکە بڵاوبوەوە .

به‌شێك له‌ نیشانه‌کانی توشبوون به‌ ڤایرۆسی کۆرۆنا هه‌مان نیشانه‌ی ئه‌نفله‌وه‌نزان، نیشانه‌كانیشى بریتین له‌: ژانه‌سه‌ر، کۆکه‌، ته‌نگه‌نه‌فه‌سى، په‌یدابونى ئازار له‌ ماسولکه‌كانى له‌ش، هه‌وکردنی سییه‌كان، له‌کارکه‌وتنی گورچیله‌.