پشتی تیمێن زێرەڤانیا ساخلەمیا ئاكرێ سەرەدانا دوو كارگەهێن بەرهەمئینانا سپیاتیان كری مەرجێن ساخلەمیێ تێدا نەبوون هەر دوو كارگەهـ هاتنە سزادان و ئێك ژوان بۆ دەمێ حەفت رۆژان هاتە گرتن.
ئاوێنە، وارهێل نێروەیی: عەبدالواحد جەمیل، بەرپرسێ زێرەڤانیا ساخلەمیا قەزا ئاكرێ بۆ "ئاوێنە" راگەهاند: تیمێن زێرەڤانیا ساخلەمیا رۆژانە سەرەدانا جهێن جودا دكەن بۆ وێ چەندێ چاڤدێری و دیفچوون مەرجێن ساخلەمیا دناڤ جهێن بازرگانی و ماركێت و كارگەهان بهێتە كرن و جهێن مەرجێن پیدڤی تیدا نەبن بهێنە سزادان و گرتن.
گوت ژی: پشتی زێرەڤانیا ساخلەمیا ئاكرێ سەرەدانا كارگەهێن بەرهەمئینانا سپیاتیان ل كومەلگەها (خەلیلكان) كری دوو كارگەهان مەرجێن ساخلەمیێ تێدا نەبون، ژبەر تێكچوون و خراپ بوون وپیسی بەرهەمێن وان 350 كیلویێن شیری و 60 كیلویێن پەنیر و ژاژی هاتنە ژناڤبرن.
گوت ژی: هەر كارگەهەك ب كوژمێ 500هزار دیناران هاتنە سزادان و كارگەهەك ژی بۆ دەمێ حەفت رۆژان دهێتە دائێخستن، ژبۆ پاراستنا ساخلەمیا وەلاتیان دیفچوون و چاڤدێریا جهێن گشتی دێ بەردەوام بیت.