د.سەباح هەورامی، بەڕێوەبەری گشتی تەندروستی سلێمانی رایگەیاند: بڕیاریانداوە پلازمانی خوێنی ئەو توشبوانەی كۆرۆنا كە چاكبونەتەوە بۆ چارەسەری توشبوانی دیكەی ڤایرۆسەكە بەكاربهێنن.

ئاوێنە: بەگوێرەی راگەیەندراوێكی بەڕێوەبەری گشتی تەندروستی سلێمانی، بڕیارەكەیان دوای ماوەی چەند هەفتەیەك گفتوگۆو راگۆرینەوەی زانستی لەگەڵ کۆمەڵێک پزیشکی پسپۆر دەربارەی بەکارهێنانی پلازمای چاکبوانی ڤایرۆسی کۆرۆنا وەک چارەسەر بۆ توشبوان و هەروەها پاش پەسەندكردنی ئەو ئەكنیكە هاتوە لەلایەن دەزگای خواردن و دەرمانی ئەمریکاوە (FDA).

د. سەباح هەورامی وتویەتی"بڕیارماندا لەمەولا ئەم تەکنیکە بەکاربهێنین بۆ توشبوانی ڤایرۆسی کۆرۆنا (بۆ ئەو نەخۆشانەی باری تەندروستیان ناجێگیر دەبێت) لە سلێمانی وەک هەوڵێک بۆ چارەسەری نەخۆشەکان بە ئومێدی چارەسەر بۆ توشبوان."

بەڕێوەبەری گشتی تەندروستی سلێمانی هیواشی خواستوە ئەو تەكنیكە كلاسیكییە سودی هەبێت.

تەمەنی بەكارهێنانی ئەم تەكنیكی چارەسەركردنە، چەند سەدەیەك دەبێت و هەروەها لەكاتی بڵابونەوەی پەتای ئەنفلۆنزادا لەساڵی 1918و لەسەردەمی بەر لە دۆزرێنەوە ڤاكسینە نوێیەكان و دەرمانە دژە ڤایرۆسەكان بەكارهاتوە.