"پیاو هە‌یە‌ لە‌ماوە‌ی 3 مانگدا 3 ژنی هێناوە‌، هە‌ر ژنێک بە‌ 100 هە‌زار دینار"
  2019-03-09       2593       

بەرپرسی لقی كەركوكی رێكخراوی هیوای عێراقی، سرود ئەحمەد رایدەگەیەنێت لە‌کە‌رکوک پیاو هە‌یە‌ لە‌ماوە‌ی 3 مانگدا 3 ژنی هێناوە‌، هە‌ر ژنێک بە‌ 100 هە‌زار دینار، بەپێویستیشی دەزانێت حكومەت پلان بۆ رێگە گرتن لەو حاڵەتە دابنێت.


ئاوێنە: سرود ئەحمەد، بەرپرسی لقی كەركوكی رێكخراوی هیوای عێراقی بەدەنگی ئەمریكای وتوە " حاڵە‌تە‌کانی جیابوونە‌وە‌ و ناپاکی هاوسە‌رێتی و هە‌ڵوە‌شاندنە‌وە‌ی خێزان لە‌کە‌رکوک لە‌ هە‌ڵکشاندایە‌، باش بونی بارودۆخی نێو خێزان پە‌یوە‌ستە‌ بە‌ دۆخی سیاسی و ئابوری و ئە‌منی وڵاتە‌وە‌".


ئاماژەبەوەش دەكات ساڵی رابردو هەزار‌و 200 حاڵە‌تی توندوتیژیان تۆمار کردوە‌، ئاشكراشیدەكات توندو تیژییە‌کان خۆیان لە‌ توندوتیژی جە‌ستە‌یی و دە‌رونی، هێنانی ژنی دوە‌م و ناپاکی هاوسە‌رێتی و چە‌ندین جۆر توندوتیژی تردا دە‌بینێتە‌وە‌.


دەشڵێت"پیاو هە‌یە‌ دو سێ گێڵ فرێندی هە‌یە‌، پیاو هە‌یە‌ ژنی دوە‌م دەهێنێ و خە‌رجی ژنی یە‌کە‌م ناکات،پیاویش هەیە‌ دو سێ ژنی ‌هێناوە‌ و ژنی یە‌کە‌م پێی نە‌زانیوە‌، پیاو هەیە لە‌ پێش چاوی ژنە‌کە‌ی قسە‌ لە‌گە‌ڵ ژنی تر دە‌کات، ژنە‌کە‌ هاندە‌دات تا بڕوات ئە‌ویش خیانە‌ت بکات، بۆیە‌ چە‌ندین ژن هەیە چوە‌ بە‌دانانی عیلاقە‌ لە‌گە‌ڵ پیاوی تر، تۆڵە‌ی لە‌ هاوسە‌رە‌کە‌ی کردۆتە‌وە‌".


راشیدەگەیەنێت ژنی دوەم لە‌دە‌رە‌وە‌ی دادگاکان و لە‌لایە‌ن مە‌لاوە‌ مارە‌ دە‌بردرێن، ئە‌وانە‌ی ژنی دوەم دەهێنن ئامانجیان پێکهێنانی خێزان نیە‌ بە‌ڵکو بۆ پڕکردنە‌وە‌ی حە‌زو ئارە‌زویە‌کی کاتییە‌، دە‌ڵێت"کابرایە‌ک هەبو لە‌ماوە‌ی سێ مانگدا ، سێ ژنی هێناوە‌، ئە‌م دیاردانە‌ خە‌ریکە‌ زۆر دە‌بن، لە‌کاتێکدا جاران شتی وا لە‌کە‌رکوک نە‌بوە‌، پیاو هاتۆتە‌ لامان، وتویە‌تی هاورێکانم هانم دە‌دە‌ن بۆ هێنانی ژنی دوەم، وتویانە‌ ژنێک بە‌ 100 هە‌زار دینارە‌، یانی مە‌عقولە‌ شتی وا؟ ". 


زۆرترین بینراو
© 2024 Awene Online, Inc. All Rights Reserved.
×