2020-04-26   761     
راوێژکاری سیاسەتەکانی دەرەوەی رێبەری کۆریای باکور رایگەیاند، کیم جونگ ئون، رێبەری کۆریای باکور لە ژیاندایە و رەوشی تەندروستیشی جێگیرە.
ئاوێنه: جۆنگ ئین مون، راوێژکاری سیاسەتەکانی دەرەوەی کیم جونگ ئون، رێبەری باڵای کۆریای باکور لەمیانەی لێداوانێکدا بۆ کەناڵی فۆکس نیوز-ی ئەمریکی رایگەیاند، “هەڵوێستی حکومەتی کۆریای باکور جێگیرە، کیم ئون جونگ لە ژیاندایە و تەندروستیشی باشە”.
ئاماژەی بەوەشکرد، کیم لە 13ی ئەم مانگەوە لەناوچەی ونسان نیشتەجێیە و هیچ جموجۆڵێکی وەهای نەکردوە، کە گومان لەسەر خراپونی رەوشی تەندروستی ئەو دروستبکات.
ماوەی دو هەفتەیە میدیا فەرمییەکانی کۆریای باکور هیچ راپۆرتێکیان لەبارەی چالاکییەکانی کیم جونگ ئونەوە بڵاونەکردەوەتەوە، ئەمە لەکاتێکدایە میدیا جیهانییەکان بەردەوام باس لە دەنگۆی تێکچونی رەوشی تەندروستی رێبەری کۆرۆیای باکور دەکەن.
دوێنێ شەممە ئاژانسی هەواڵی رۆیتەرز لە زاری سێ سەرچاوەی باڵای نزیک لە روداوەکەوە، کە لەبەر هەستیاری بابەتەکە نەیانویستبو ناوی خۆیان ئاشکرابکەن رایگەیاند، شاندێک بە سەرۆکایەتی، ئەندامێکی دیاری پەیوەندییە نێودەوڵەتییەکانی حکومەتی چین لە پەکینەوە بەرەو پۆنگ یانگ بەڕێکەوتوە، بۆ نزیکەوە ئاگاداربون لە رەوشی تەندروستی کیم ئون جونگ، رێبەری باڵای کۆریای باکور.