2020-08-14 2097
ئا: د. عیسا عه‌بدولره‌حمان
ڤاکسینی هەردو کۆمپانای فایزەری ئەمریکی‌و بایۆنتیکی ئەڵمانی، لەقۆناغی یەکەم‌و دووەمی تاقیکردنەوە لەسەر مرۆڤ، سەرکەوتنێکی زۆرباشی بەدەستهێناوە.
ئەنجامی سەرەتایی تاقیکردنەوەی ڤاکسینی فایزەر + بایۆنتیک، ڤاکسینی دژەکۆڕۆنا، بەناوی BNT162b1، لە جۆڕناڵی نەیچەر بڵاوکرایەوە، ئەنجامەکانیش زۆر دڵخۆشکەرن.
ڤاکسینەکە؛ قۆناغی یەکەم / دووەمی بە بەشداری ٤٥ خۆبەخش، لەنێوان تەمەنەکانی ١٨ - ٥٥ ساڵ، تێپەڕاند. تێیدا سێ ژەمی ڤاکسینەکە؛ ١٠ مکگم، ٣٠ مکگم و ١٠٠ مکگم، بە دوو ژەم "جگە لە ١٠٠ مکگم" تاقیکرانەوە، کە نێوانی دوو ژەمەکە، ٢١ رۆژ بوو.
روودانی کاردانەوەی بەرگریی جەستە؛ بەچالاکبوونی لیمفەخانەکان‌و دروستبوونی دژەتەنی هاوسەنگ لەرۆژی بیستویەکەم، دوای لێدانی ژەمی یەکەمی ڤاکسین تێبینیکرا، دواتر لە رۆژی بیستویەکەم کە ژەمی دووەمی ڤاکسینەکە لێدرا، دوای حەوت رۆژ، کاردانەوەی بەرگریی جەستە زیاتربوو.
ڤاکسینەکە وێڕای کاریگەری، سەلامەتیش بووە، هیچ جۆرە کاریگەرییەکی مەترسیداری درووستنەکرد، تەنها سەرئێشە لەشداهێزرانی کاتی.
ڤاکسینەکەی کۆمپانیای فایزەرو بایۆنتیک، لەسەر پلاتفۆڕمی mRNA دروستکراوە، کە ریزبەندیی کۆدی جیناتی پێویستی ئەنتیجینی کۆڕۆنای تێدا دیزاینکراوە، هەر دوای چوونەناو لەشەوە، بەپڕۆسەی لەبەرگرتنەوە، پڕۆتینی ئەنتیجینی کۆڕۆنا دروستببێت، بەمەش کاردانەوەی بەرگریی جەستەی بەهۆی لیمفەخانەکان لێدەکەوێتەوەو دژەتەنی دژەکۆڕۆنا دروستدەبن، بەمەش کەسەکە بەبێ ئەوەی تووشی کۆڕۆنا ببێت، دەبێتە خاوەنی دژەتەنی دژەکۆڕۆنا.
لەئێستادا، ڤاکسینێکی دیکەی فایزەرو بایۆنتیک، بەناوی BNT162b2 لە قۆناغی سێیەمی تاقیکردنەوە کلینیکییەکاندایەو بە بەشداری ٣٠ هەزار خۆبەخش تاقیدەکرێتەوە.
حکومەتی ئەمریکا؛ رێکەوتنی کڕینی پێشوەختەی بۆ بەزوویی دەستەبەرکردنی ڤاکسینیBNT162b1، بەبەهای نزیکەی دوو ملیار دۆلار، ئەنجامداوە. بەپێی رێککەوتنەکە؛ دوو کۆمپانیاکە ١٠٠ ملیۆن ژەمی ڤاکسینەکەیان، دوای سەرکەوتن و پەسەندکردنی، بۆ ئەمریکا دابیندەکەن، دواتریش ئەمریکا ٥٠٠ ملیۆن ژەمی دیکەی ڤاکسینەکە، دەکڕێت. حکوومەتی بەریتانیاش ٣٠ ملیۆن ژەمی ڤاکسینەکەی دەستەبەرکردووە.
سەرچاوە؛
https://www.nature.com/articles/s41586-020-2639-4
https://www.clinicaltrialsarena.com/news/pfizer-covid-vaccine-early-data/