2021-02-09
وتەبێژی وەزارەتی تەندروستی عێراق رایگه‌یاند، کۆتایی ئەم مانگە ڤاکسینی کۆرۆنا دەگاتە عێراق‌و هەرێمی کوردستان. جه‌خت له‌وه‌ش ده‌كاته‌وه كه هێشتا کۆرۆنا مەترسییە لەعێراقداو بەپێی دوایین ئامار، ڕێژەی توشبووان لەزیادبوندایە.
ئاوێنه: سەیف بەدر، وتەبێژی وەزارەتی تەندروستی عێراق باس له‌واده‌ی گه‌یشتنی ڤاکسینی کۆرۆنا ده‌كات‌و ده‌ڵێت، "یەکەم وەجبەی ڤاکسینی کۆرۆنا کۆتایی ئەم مانگە دەگاتە عێراق، ئەویش ڤاکسینی ڤایزەرو ئیسترازێنیکایەو لەهەموو شارو شارۆچکەکانی عێراق بەهەرێمی کوردستانیشەوە دابه‌شی ده‌كه‌ین، دابەشکردنی ڤاکسینەکەش لەسەر شێوازی چڕیی دانیشتووان دەبێت."
وتیشی، بەداخەوە هێشتا کۆرۆنا مەترسییە لەعێراقداو بەپێی دوایین ئاماریش، ڕێژەی توشبووان لەزیادبوندایە. "ئەمڕۆش حاڵەته‌كان لەزیادبوندابون، دەبێ ئاگاداری ئەوە بین هێشتا کۆرۆنا مەترسییەکی جددیە بۆ سەر تەواوی شارەکانی عێراق."
وتەبێژی وەزارەتی تەندروستی عێراق هۆشداریدا لەشەپۆلێکی تری کۆرۆناو دەڵێت، دەبی خەڵک ئاگادار بن‌و خۆیان بپارێزێن، تا ڤاکسین دەگاتە عێراق.