2021-07-02 3522
تێدرۆس ئەدهانۆم
سەرۆکی رێکخراوی تەندروستی جیهانیی ده‌ڵێت، له‌ئێستادا جیهان لەقۆناغێکی زۆر مەترسیداری پەتای کۆرۆنادایەو به‌پێویستیشی ده‌زانێت كه تا کۆتایی ئەمساڵ لەهەموو وڵاتێك به‌ڕێژه‌ی 70%ی دانیشتوانیان به‌ڤاکسینی دژه كۆرۆنا بكوترێن.
ئاوێنه: تێدرۆس ئەدهانۆم، سەرۆکی رێکخراوی تەندروستی جیهانیی رایگەیاند، ئێستا جیهان لەقۆناغێکی زۆر مەترسیداری پەتای کۆرۆنادایەو پێویستە تا کۆتایی ئەمساڵ هەموو وڵاتێك ڤاكسینی دژه كۆرۆنا به ڕێژه‌ی 70%ی هاوڵاتیانی خۆی بدات.
ناوبراو وتیشی، لەو وڵاتانەی رێژەی دابینکردنی ڤاکسین لەئاستێکی نزمدایە، جارێکی دیکە پڕبونەوەی یەکەکانی چاودێری چڕی نەخۆشخانەکان وەك پێشتری لێهاتۆتەوە.
سەرۆکی رێکخراوی تەندروستی جیهانی ڕونیكرده‌وه كه هێشتا هیچ وڵاتێك لەمەترسییەکانی کۆرۆنا رزگاری نەبووە. جۆری گۆڕاوی دێلتاكۆرۆنا هێشتا مەترسیدارەو بەرده‌وامە لەبڵاوبونەوەو خۆگۆڕین.
ئه‌وه‌شی وت، "داوام لەسەرکردەی وڵاتان کردووە تا کۆتایی ئەمساڵ لەهەموو وڵاتێك به‌ڕێژه‌ی 70%ی دانیشتوانیان به‌ڤاکسینی دژه كۆرۆنا بكوترێن، چونكه ئەمە باشترین رێگەیە بۆ هێواشکردنی بڵاوبونەوەی پەتاکەو رزگارکردنی گیانی خەڵك و خستنەوە سەرپێی ئابوری و شکستپێهێنان بەپەتاکە."