لەراگەیەنراوێكیدا قایمقامیەتی پارێزگای هەولێر داخستنی ژمارەیەك نۆرینگە‌و كۆگای دەرمان ئاشكرا دەكات، هۆكارەكەشی دەگەرێنێتەوە بۆ پابەند نەبونیان بە رێنماییەكانی كوالێتی كۆنترڵی دەرمان، هۆكارێكی دیكە فرۆشتنی دەرمانی بێ مۆڵەت‌و نایاسایی بوە.
ئاوێنە: قایمقامیەتی پارێزگای هەولێر لەسەر لاپەرەی تیبەتی خۆی لەتۆری كۆمەڵایەتی فەیسبوك راگەیەنراوێكی لەسەر داخستنی نۆ نۆرینگە‌و دو كۆگای دەرمان‌و دەرمانخانەیەك بڵاوكردەوە كەتێیدا هاتوە " لێژنەی باڵای بەدواداچونی دەرمان کە پێکھاتوە لەسەرۆکایەتی قایمقامیەتی قەزای ناوەندیی هەولێر و بەڕێوەبەرایەتی کۆنترۆڵی جۆری دەرمان، بەڕێوەبەرایەتی نەھێشتنی تاوانی ڕێکخراو سەربە ئاژانسی پاراستن و بە ھاوکاری هێزی تایبەتی یەک و بەشی پۆلیسی شارەوانی، دو کۆگای دەرمان له شەقامی پزیشکانی هەولێر، نۆ نۆڕینگه و دەرمانخانەیەک له مامزاوه و قۆریتان بەسەر کرانەوه و هەمویان داخران".
راشیدەگەیەنێت هۆکاری داخستنی ئەم شوێنانەش بۆئەوە دەگەڕێتەوه دەرمانی نایاسایی و مۆڵەت پێنەدراویان فرۆشتوە، دەشڵێت "هەمو دەرمانه قاچاخ و بێ‌مۆڵەتەکان دەستیان بەسەردا گیرا، ڕێکاری یاسایی گیرایە بەر لەبەرامبەر سەرپێچی کاران، هاوڵاتیان دڵنیا دەکەینەوە ئەم لێژنەیە بەردەوام دەبێت لەپێناو بەرژەوەندی گشتی وپاراستنی تەندروستی".
